Gujarati News

માન્ચેસ્ટર:કોરોના વાયરસને કારણે ચાર મહિના સુધી ક્રિકેટનો ભોગ લેવાયો અને હવે આ વાયરસને કારણે એક ક્રિકેટરે ટીમમાંથી સ્થાન ગુમાવવું પડ્યું છે. પ્રવાસી વેસ્ટ ઇન્ડિઝ સામે ગુરુવારથી અહીં શરૂ થનારી બીજી ક્રિકેટ ટેસ્ટના પ્રારંભે જ કોરોના માટેના બાયો સિક્યોર પ્રોટોકોલનો ભંગ કરવા બદલ ઇંગ્લેન્ડના ઝડપી બોલર જોફરા આર્ચરને ટીમમાંથી બાકાત કરી દેવામાં આવ્યો હતો. તેણે હવે પાંચ દિવસના આઇસોલેશનમાં રહેવું પડશે અને એ દરમિયાન બે વખત કોરોનાના ટેસ્ટ કરાવવા પડશે. આર્ચરે પોતાની ભૂલ માટે માફી માગી લીધી હતી પરંતુ ઇંગ્લેન્ડ એન્ડ વેલ્સ ક્રિકેટ બોર્ડના નિવેદનમાં આ બાબતનો ઉલ્લેખ ન હતો. જ્યારે બીબીસી રેડિયો કોમેન્ટરી ટીમે જણાવ્યું હતું કે પ્રથમ ટેસ્ટ પૂરી થયા બાદ જોફરા આર્ચર તેના બ્રાઇટન ખાતેના ઘર ગયો હતો જે નિયમનો ભંગ હતો.