Gujarati News

 નવી દિલ્હીઃ કોરોનામાં નાણાંકીય સંકટ સામે લડી રહેલ ક્રિકેટ સાઉથ આફ્રિકા (સીએસએ) માટે ભારતીય ટીમનો આગામી પ્રવાસ બહુ મહત્વનો છે.

હાલમાં જ કોરોનાના નવા વેરીંયેન્ટના ઘણા કેસો જાહેર થયા છતા ભારતીય ક્રિકેટ ટીમ આ મહિને દક્ષિણ આફ્રિકાના પ્રવાસે જઇ રહી છે ત્યારે દક્ષિણ આફ્રિકન ક્રિકેટ બોર્ડ ભારતીય ટીમની સુરક્ષા અને સુવિધામાં કોઇ કસર છોડવા માંગતુ નથી.

એક રીપોર્ટ અનુસાર સીએસએ એ સેન્ચ્યુરીયનમાં ભારતીય ટીમ માટે એક આખી હોટલ બુક કરી લીધી છે. ભારતીય ટીમ ૧૭ ડિસેમ્બરે આ હોટલમાં પહોંચશે. આ હોટલમાં સીએસએ ભારતીય ટીમ માટે બાયોબબલ બનાવશે. હોટલમાં કડક સુરક્ષા રહેશે અને બહારની કોઇપણ વ્યકિતને પ્રવેશની પરવાનગી નહિ આપવામાં આવે કોરોના દરમિયાન શ્રીલંકન ટીમ પણ આ હોટલમાં જ રોકાઇ હતી.

કોરોના વાયરલ સામે સુરક્ષીત વાતાવરણ તૈયાર કરવા માટે સીએસએ એક અધિકારી નિયુકત કરશે. ખેલાડીઓ ઉપરાંત બાયોબબલમાં રહેનારા બધા લોકો કોરોના પ્રોટોકોલનું પાલન કરે તે જોવાની જવાબદારી આ અધિકારીની રહેશે.

આ સાવચેતીઓ રાખવામાં આવશે

હોટલના બધા સ્ટાફને અહિં પહેલાથી જ કવોરન્ટાઇન કરી દેવામાં આવશે. ભારતીય ટીમ અહિં આવ્યા પહેલાથી જ સ્ટાફ બાયોબબલમાં હશે.

ભારતીય ખેલાડીઓ અને મેચ અધિકારીઓ ઉપરાંત હોટલ સ્ટાફના સભ્યોનો પણ સતત કોરોના ટેસ્ટ કરાતો રહેશે.

ખેલાડીઓના ખાવા-પીવાની અને તેમના ઉપયોગની વસ્તુઓને બરાબર સેનેટાઇઝ કરીને હોટલમાં પહોંચાડવામાં આવશે.