Gujarati News

નવી દિલ્હી : ઓલિમ્પિક બ્રૉન્ઝ મેડાલિસ્ટ વિજેન્દર સિંહ યુવાનોનો રોલ મૉડલ છે. બધા તેના જેવા બનવા માગે છે, તેમાંથી જ એક છે રાજેશ કુમાર કસાના. લાઈટવેટ કેટેગરીમાં ભારતનો નંબર 1 બૉક્સર રાજેશ પણ ભિવાનીથી છે અને વિજેન્દરના ઘરથી થોડે જ દૂર રહે છે. દુ:ખદ વાત એ છે કે, તે આજીવિકા માટે ચા વેચવા મજબૂર છે. રિંગમાં મોટા-મોટા દેસી-વિદેશી બૉક્સર્સને ધૂળ ચટાડનારા આ બૉક્સરને મદદની આશા છે જેનાથી તે દુનિયાભરમાં પોતાના દેશનું નામ રોશન કરી શકે.

ભાઈ સાથે મળીને ચલાવે છે ચાની દુકાન

વાતચીતમાં તેણે પોતાનું દુ:ખ વ્યક્ત કરતા કહ્યું. ’10 રૂપિયાની એક ચા અને થોડો નાસ્તો વેચું છું. આનાથી જ ગુજારો કરી રહ્યો છું.’ આ કામમાં રાજેશનો ભાઈ તેની મદદ કરે છે. ગરીબીથી ઝઝૂમી રહ્યો હોવા છતા રાજેશે હજુ હાર માની નથી અને સતત બૉક્સિંગનું સપનું સાકાર કરવા માટે આકરી મેહનત કરી રહ્યો છે. તે સવારે 5થી બપોરે 1 વાગ્યા સુધી ચાની દુકાન ચલાવે છે. ત્યારબાદ તેનો ભાઈ દુકાન પર રહે છે અને તે થોડો આરામ કર્યા બાદ સાંજે 6 વાગ્યે પ્રેક્ટિસ શરૂ કરે છે.

પિતાનું સપનું પૂરૂ કરવા કંઈપણ કરશે

આટલી મુશ્કેલીઓ છતા બૉક્સિંગ ચાલુ રાખવા અંગે રાજેશ કહે છે કે, ‘મારા પિતાનું સપનું હતું કે, હું બૉક્સર બનું. તે સપનાને પૂરું કરવા હું કંઈપણ કરવા માટે તૈયાર છું.’ રાજેશના પિતા કેન્સરને કારણે મૃત્યુ પામ્યા હતા. પિતા પ્રૉફેશનથી ડ્રાઈવર હતા અને રાજેશે સ્કૂલ છોડી ડ્રાઈવિંગ શરૂ કરી દીધી. રાજેશે પ્રોફેશનલ કરિયરનની પહેલી ફાઈટ મનપ્રીત સિંહ સાથે કરી હતી. ત્યારબાદ તેણે 10માંથી 9 ફાઈટ જીતી છે જ્યારે 1 ડ્રૉ રહી છે. તેની બૉક્સિંગના લેવલનો અંદાજો તમે એ વાત પરથી લગાવી શકો છો કે, તે લાઈટવેટ કેટેગરીમાં ભારતનો નંબર 1 બૉક્સર છે જ્યારે વર્લ્ડ બૉક્સિંગ કાઉન્સિલની રેંકિંગમાં તેનો નંબર 221મો છે.

વિજેન્દર સાથે ન કરી શક્યો મુલાકાત

બૉક્સિંગ કરિયરની શરૂઆતમાં તે પોતાના રોલ મૉડલ વિજેન્દર પાસેથી મદદ ઈચ્છતો હતો. આ માટે તેણે વિજેન્દરને મળવાનો પ્રયત્ન કર્યો પણ નિષ્ફળ રહ્યો. ચોંકાવનારી વાત એ છે કે, બંનેના ઘર થોડા કીમીના અંતરે જ છે. તે જણાવે છે કે, ‘હું મિત્રોના કહેવાથી એકવાર તેને મળવા ગયો હતો પણ મળી શક્યો નહીં. તે બિઝી હતા.’ રોચક વાત એ છે કે, જ્યારે વિજેન્દર સિંહે પ્રોફેશનલ કરિયરની 8મી ફાઈટ 2016માં તાન્જાનિયાના ફ્રાન્સિસ ચેકા સાથે દિલ્હીના ત્યાગરાજ સ્ટેડિયમમાં લડી ત્યારે રાજેશની પણ ફાઈટ હતી. તે જ સ્ટેડિયમમાં રાજેશે યુગાન્ડા મુબારકા સાથે ફાઈટ કરી હતી.