Gujarati News

શારજાહ, તા.૮ :  પાકિસ્તાને રવિવારના રોજ આઈસીસી ટી૨૦ વર્લ્ડ કપના સુપર ૧૨ લેવલની ગ્રુપ ૨ મેચમાં સ્કોટલેન્ડ વિરૂદ્ધ ચાર વિકેટ પર ૧૮૯ રનનો મોટો સ્કોર કર્યો હતો.

આ સ્કોર આપવા પાછળ કેપ્ટન બાબર આઝમની સાથે સાથે શોએબ મલિકનો પણ મોટો હાથ છે. કેપ્ટન બાબર આઝમે ૪૭ બોલમાં ૬૬ રનની ઈનિંગ રમી હતી જ્યારે શોએબ મલિકે ૧૮ બોલમાં છ છગ્ગા ફટકારીને ૫૪ રન ઝૂડી કાઢ્યા હતા. પાકિસ્તાને અંતિમ પાંચ ઓરમાં એક વિકેટ ગુમાવીને ૭૭ રન આપ્યા હતા, જ્યારે અંતિમ આઠ ઓવરમાં ૧૧૪ રન કર્યા હતા.

શોએબ મલિકની આક્રમકતાનો અંદાજ અંતિમ ઓવરમાં થયેલા ૨૬ રન પરથી લગાવી શકાય છે જેમાં તેમણે ત્રણ છગ્ગા અને એક ચોગ્ગો ફટકાર્યો છે. આ દરમિયાન તેને ચિયર કરવા માટે પેવેલિયન આવેલી તેની પત્ની સાનિયા મિર્ઝા અને દીકરો રાજીના રેડ થઈ ગયા હતા. બન્ને મલિકના દરેક રનને એન્જોય કરતા હતા. મોહમ્મદ હફીઝે આ મેચમાં ૩૧ રનનું યોગદાન આપ્યું છે.

૧૫મી ઓવરના અંતિમ બોલ પર જ્યારે મોહમ્મદ હફીઝ આઉટ થયો ત્યારે શોએબ મલિક ક્રીઝ પર ઉતર્યો. આવતાની સાથે જ શોએબ મલિકનું આક્રમક વલણ જોવા મળ્યું.

શોએબ મલિકે ધમાકેદાર બેટિંગ દરમિયાન છ છગ્ગા ફટકાર્યા અને એક ચોગ્ગો માર્યો. ઓપનર બેટ્સમેન મોહમ્મદ રિઝવાનને શરૂઆતમાં રમવામાં મુશ્કેલી થઈ રહી હતી, માટે પાવરપ્લેમાં ટીમ માત્ર ૩૫ જ રન કરી શકી. આગામી ઓવરમાં જ રિઝવાન આઉટ થઈ ગયો. ફખર જમાનું પ્રદર્શન આ મેચમાં સારું નહોતુ રહ્યું અને તે લાંબો સમય સુધી ક્રીઝ પર ટકી નહોતો શક્યો.

ગ્રીવ્સના બોલને રમવાના પ્રયાસમાં તે આઉટ થઈ ગયો હતો. તે સમયે ટીમનો સ્કોર બે વિકેટ પર ૫૯ હતો. હફીઝે આવીને શાનદાર ચોગ્ગા માર્યા અને કેપ્ટન બાબર આઝમનો સારો સાથ આપ્યો.