Gujarati News

નવી દિલ્હી: ઓસ્ટ્રેલિયાની મહિલા ક્રિકેટ ટીમની ઓલરાઉન્ડર એલિસ પેરીએ બ્રિસબેનમાં શ્રીલંકા સામેની વન-ડે મેચમાં એના નામ પર ક્રિકેટ ઈતિહાસનો કમાલનો રેકોર્ડ બનાવ્યો છે. એલિસ પેરીએ માત્ર ૧૧૦ વન-ડેમાં સૌથી ઝડપી ૩,૦૦૦ રન અને ૧૫૦ વિકેટ મેળવી છે. ઘણા પુરુષ ક્રિકેટરોને પાછળ રાખીને તેણે આ અનોખો રેકોર્ડ બનાવ્યો છે. એલિસ પેરીએ ૧૧૦ વન-ડેમાં ૫૨.૯૨ રનની સરેરાશથી ૩,૦૧૭ રન બનાવ્યા છે. તેના નામે બે સદી અને ૨૭ અર્ધી સદી નોંધાયેલી છે. તેણે ૧૫૦ વિકેટ ઝડપી છે. તેનો ઈકોનોમી રેટ ૪.૩૫નો છે. વન-ડેમાં તેની બેસ્ટ બોલિંગના આંકડામાં ૨૨ રનમાં ૭ વિકેટ છે. તેણે ત્રણ વાર પાંચ વિકેટ મેળવવાનું પરાક્રમ કર્યું છે. પુરુષ ક્રિકેટ ઈતિહાસમાં ઘણા ઓલરાઉન્ડરો થયા છે પણ ૩,૦૦૦ રન અને ૧૫૦ વિકેટ ૧૧૦ વન-ડેમાં લેવામાં તેઓ સફળ રહ્યા નહોતા. બાંગ્લાદેશનો શાકિબ અલ હસન પહેલો ઓલરાઉન્ડર છે જેણે માત્ર ૧૧૯ વન-ડે મેચોમાં આ સિદ્ધિ મેળવી છે. જોકે એલિસ પેરીએ એને પણ પાછળ ધકેલી દીધો છે અને તેના કરતાં પણ ૯ ઓછી મેચો રમીને આ પરાક્રમ કર્યું છે.