Gujarati News

(ભુજ) કચ્છમાં છેલ્લા ૩૦ કલાકથી પડી રહેલા ભારે વરસાદને કારણે અનેક જળાશયોમાં નવા નીર આવ્યા છે. જોકે, રાપર ધોળાવીરા વચ્ચે નર્મદા કેનાલ ઉપર બનેલા નવા પુલની બન્ને સાઈડો બેસી જતાં બસ સહિતના અનેક વાહનો ફસાઈ ગયા હતા. જ્યારે કચ્છના મધ્યમકક્ષાના ૨૦ ડેમ પૈકી આજે ત્રણ ડેમ ઓવરફ્લો થઈ ગયા છે. બે ઓવરફ્લો થવાની તૈયારી છે. ગત અઠવાડિયે ૮ ડેમ ઓવરફ્લો થઈ ગયા હતા તે ફરી આ વરસાદમાં ઓવરફ્લો થઈ ગયા છે. કુલ ૧૩ ડેમ ઓવરફ્લો થયા જ્યારે અન્ય ૭ માં પણ સારું પાણી આવ્યું છે. ગઈકાલે અંજારનું તળાવ ઓવરફ્લો થયા બાદ આજે રાપરનું તળાવ ઓવરફ્લો થઈ ગયું છે. તો, ભુજનું ઐતિહાસિક હમીરસર તળાવ ઓવરફ્લો થવામાં ૪ ફૂટ જેટલું બાકી છે. કચ્છના અનેક ગામોમાં નદીઓ ફરી બે કાંઠે વહેતી થતાં લોકોના જીવ અદ્ધર થયા હતા. અનેક જગ્યાએ વાહનવ્યવહાર પણ અટવાયો છે. નીચાણવાળા વિસ્તારમાં પાણી ભરાયા છે.