Gujarati News

જામનગર તા ૧૯ : અલગ અલગ વોર્ડ માં વિકસિત ભારત- વિકસિત ગુજરાત ના કાર્યક્રમની શળંખલા અંતર્ગત છેલ્લા ૪૮ કલાક દરમિયાન એકી સાથે રૂપિયા ૨૦૭૯.૧૮ લાખ ના કુલ  ૪૭ વિકાસ કામોનું ખાતમુહૂર્ત ધારાસભ્‍ય દિવ્‍યેશ અકબરીના હસ્‍તે કરવામાં આવ્‍યું છે.

વોર્ડ નંબર ૭,૮, ૯, ૧૦,૧૩,૧૪,૧૫ અને ૧૬ ના જુદા જુદા વિસ્‍તારોમાં છેલ્લા ૪૮ કલાક ના સમયગાળા દરમિયાન રૂપિયા ૨૦૭૯ .૧૮ લાખના નવા ૪૭  વિકાસકાર્યોના ખાતમુહૂર્ત કરવામાં આવ્‍યા હતા, અને ધારાસભ્‍ય દિવ્‍યેશ અકબરી તેમજ જામનગર શહેરના અન્‍ય અગ્રણીઓ ઉપસ્‍થિતિમાં તેમજ જે તે વિસ્‍તારના આગેવાનો- નાગરિકોની હાજરીમાં કરવામાં આવ્‍યા હતા.

આ ખાતમુહૂર્તના કાર્યક્રમની શળંખલામાં પણ પ્રત્‍યેક સ્‍થળે ધારાસભ્‍ય દિવ્‍યેશ અકબરી નું સ્‍થાનિક વિસ્‍તારની બાળાઓ દ્વારા કુમકુમ તિલકથી સ્‍વાગત કરવામાં આવ્‍યું હતું, અને સર્વે આસપાસના વિસ્‍તારના રહેવાસીઓએ આવકાર આપ્‍યો હતો. આ વેળાએ તેઓની સાથે નગરના મેયર વિનોદભાઈ ખીમસુરીયા, સ્‍ટેન્‍ડિંગ કમિટીના ચેરમેન નિલેશ કગથરા, ડેપ્‍યુટી મેયર ક્રિષ્‍નાબેન સોઢા,શાષક પક્ષના નેતા આશિષભાઇ જોષી,દંડક કેતનભાઈ નાખવા,પૂર્વ મેયર હસમુખભાઈ જેઠવા, પૂર્વ ડેપ્‍યુટી મેયર ગોપાલભાઈ સોરઠીયા,તેમજ અલગ અલગ વોર્ડ ના કોર્પોરેટરો, ભારતીય જનતા પાર્ટીના અન્‍ય હોદ્દેદારો, કાર્યકર્તાઓ તથા સ્‍થાનિક રહેવાસીઓ ઉપસ્‍થિત રહ્યા હતા. તેઓની ઉપસ્‍થિતિમાં તમામ વિકાસ કાર્યોના ખાતમુહૂર્ત કરાયા હતા. અને સ્‍થાનિક નાગરિકોએ ધારાસભ્‍ય દિવ્‍યેશ અકબરી તથા શહેર ભાજપ સંગઠનના અન્‍ય હોદ્દેદારો ને આવકાર આપ્‍યો હતો.