Gujarati News

મોરબી તા. ૧૭ : મોરબીના ચાંચાપર ગામે ઘરમાં ઘુસી ચાર વર્ષ અગાઉ બે મહિલાઓને માર મારવાના કેસમાં કોર્ટમાં ફરિયાદ કરવામાં આવી હતી જે ફરિયાદ મામલે મોરબીની કોર્ટમાં કેસ ચાલી જતા આજે મોરબી કોર્ટે મહત્વપૂર્ણ ચુકાદો આપી આરોપી ભુજ પીએસઆઈ સહીત તેના પરિવારના ચાર સદસ્યોને એક વર્ષની સજા ફટકારવાનો આદેશ આપવામાં આવ્યો છે.

આ બનાવ અંગેની વિગત એવી છે કે, મહેશ ટેટીયા નામના પોલીસ કર્મચારીની બહેન ચાંચાપર સાસરે હોય જે રીસામણે હોવાથી આ બાબતે પોલીસ કર્મચારી મહેશ ટેટીયા, તેના પિતા હરખજી ટેટીયા, ભગવતીબેન ટેટીયા અને ઉર્મિલાબેન ટેટીયા સહિતનાઓએ તા. ૦૩-૦૯-૨૦૧૪ ના દિવસે ચાંચાપરમાં બહેનના સાસરિયાના ઘરે પહોંચી બઘડાટી બોલાવી હતી.

જેમાં ઘરે રહેલા બહેનના નણંદ અસ્મિતાબેન ભુદરભાઈ પટેલ અને તેની માતા અનસોયાબેન પટેલને માર મારવામાં આવ્યો હતો જે બનાવ અંગે અસ્મીતાબેન પટેલ મોરબી તાલુકા મથકમાં ફરિયાદ નોંધાવવા તજવીજ કરી હતી જોકે પોલીસે માત્ર એનસી નોંધ કરી હતી તો જીલ્લા પોલીસવડાએ પણ પરિવારની ફરિયાદ ના સાંભળતા અસ્મીતાબેને વકીલ નરેન્દ્રસિંહ ઝાલા મારફત મોરબીની કોર્ટમાં ફોજદારી ફરિયાદ કરી હતી.

આ મારામારી અંગે કેસ ચાલી જતા આજે ચીફ જયુડી. મેજીસ્ટ્રેટ પટેલે આરોપી જે મહેશ ટેટીયા જે તે વખતે રાજકોટ પોલીસમાં અને હાલ ભુજ પીએસઆઈ તરીકે કાર્યરત હોય તે ઉપરાંત તેના પિતા હરખજીભાઇ, ભગવતીબેન અને ઉર્મિલાબેન એ ચાર આરોપીને એક વર્ષની કેદની સજા ફટકારવામાં આવી છે તેમજ ૧૦૦૦ રૂપિયાનો દંડ અને ભોગ બનનારને ૨૦,૦૦૦ રૂપિયા વળતર ચૂકવવાનો પણ આદેશ કર્યો છે. અને આરોપી મહેશ ટેટીયા જે તે વખતે રાજકોટ પોલીસમાં ફરજ બજાવતો હોય તેમજ હાલ ભુજ પીએસઆઈ હોવાનું પણ સુત્રો જણાવી રહ્યા છે ત્યારે પોલીસનો રોફ જમાવતા આ પરિવારને કોર્ટે સજા ફટકારી મહત્વપૂર્ણ ચુકાદો આપ્યો છે.