Gujarati News

અમરેલીઃ સ્વાદિષ્ટ અને ખુશબોદાર કેસર કેરીએ પેનેસ્લાવિયાની યુનિવર્સિટીના 6 વિદ્યાર્થિનીઓના એક ગ્રુપને આકર્ષ્યું છે. આ વિદ્યાર્થિનીઓ યુએસથી અમરેલી જિલ્લાના સાવરકુંડલા તાલુકાના વિરડી ગામમાં આવી પહોંચી છે. એરિકા ફેરનુ, એશ્લી ગ્રેબ, જોર્ડન સ્ટર્મ અને સોફી કેફરી યુનિવર્સિટી ઓફ પિટ્સબર્ગમાં અભ્યાસ કરે છે. તેઓ ભાસ્કર સવાણીના સવાણી મેંગો ફાર્મની મુલાકાતે છે.

આ વિદ્યાર્થિનીઓ USથી અહીં ભાસ્કર સવાણીની દીકરીઓ અમી અને શૈલી સાથે આવી છે. આ વિદ્યાર્થિનીઓ પ્રી-ડેંટલ અને પ્રી-હેલ્થ પ્રોફેશનમાં છે. એરિકાએ સહયોગી ટાઈમ્સ ઓફ ઈંડિયા સાથે વાત કરતાં કહ્યું કે, “ગયા વર્ષે જ્યારે અમીના પેરેન્ટ્સે કેરી મોકલી હતી ત્યારથી જ કેરી મને શ્રેષ્ઠ ફળ લાગી. ત્યારે જ મેં નક્કી કર્યું કે ગુજરાત જઈને અમીના ખેતરની મુલાકાત લઈશ.”

અમીએ કહ્યું કે, “અમારો મુખ્ય ઉદ્દેશ વોલંટિયર કરવાનો હતો. અમે ભમોદ્રા દામની એક શાળામાં ફ્રી ડેંટલ કેમ્પનું આયોજન કર્યું હતું. સાથે જ સંસ્કૃતિ, લોકોની જીવનશૈલી વિશે જાણવા માટે વિરડી ગામની પણ મુલાકાત લીધી. અમારે જાણવું હતું કે શહેર અને ગામડાંના લોકોની રહેણીકરણીમાં કેટલો તફાવત છે. અને USથી આવેલી આ યુવતીઓ કેસર કેરીના પ્રેમમાં પડી ગઈ.”

2007માં રાષ્ટ્રપતિ બુશની સરકાર અમેરિકામાં હતી ત્યાં સુધી ભારતની કેરીઓ USમાં પ્રતિબંધિત હતી, કારણકે ભારત પાસે કેરી એક્સપોર્ટ કરવા માટે ફાયટોસેનેટરી પ્રોટોકોલ (Phytosanitary Protocol) નહોતો. સવાણીએ કહ્યું કે, “મેં 18 વર્ષથી ભારતીય કેરી પર લાગેલા પ્રતિબંધને દૂર કરવા માટે USના એગ્રિકલ્ચર વિભાગને સમજાવ્યો. પરંતુ ફેડરેલ અધિકારીઓને ડર હતો કે આ પગલાંથી તેમના દેશમાં જંતુઓ ફેલાશે. પણ મેં સતત વોશિંગ્ટન DC અને નવી દિલ્હી વચ્ચે લોબિંગ ચાલું રાખ્યું.”

જ્યારે USમાં ભારતીય કેરી પરનો પ્રતિબંધ હટ્યો ત્યારે અમીની ફ્રેંડ્સને લાગ્યું કે, હવે તેઓએ કેસર કેરી જ્યાં પાકે છે તે સ્થળની મુલાકાત લેવી જોઈએ. સાથે જ ગીરના સિંહ જોવાનો મોકો પણ મળશે. એશ્લીએ કહ્યું કે, “અમીના ગામના ખેડૂતોએ કેરી કેવી રીતે પાડવી તે શીખવ્યું. મને નહોતી ખબર કે કેરી પાડવા માટે આંબા પર ચડવું પડે. એ જોવા અને શીખવાની મજા આવી.”

જોર્ડને કહ્યું કે, “મને ઊંચાઈ પરથી નજારો જોવાની ખૂબ મજા પડી સાથે જ કેરી ખાવાની તો મજા આવી જ.” સોફીએ જણાવ્યું કે, “અમે ખેતરમાં તો ફર્યા જ સાથે નજીકમાં આવેલા મંદિરો અને આશ્રમની પણ મુલાકાત લીધી.” ગયા મહિને પણ સવાણી ફાર્મમાં સાઉથ કોરિયાના બે લોકો આવ્યા હતા, જે ટૂંક સમયમાં જ કેરીનો ઓર્ડર આપશે.