Gujarati News

આટકોટ તા. ૮ :.. જસદણ-વિંછીયા તાલુકામાં કોરોનાની કપરી કામગીરી કરતા નેશનલ હેલ્થ મિશન યોજના હેઠળના કરાર આધારિત કર્મચારીના બે મહિનાથી પગાર ન થતા અમુક કર્મચારીઓને ઉછીના ઉધાર કરવા પડયા છે.

જસદણ-વિંછીયા તાલુકામાં નેશનલ હેલ્થ મિશન યોજના હેઠળ હાલ જસદણ - વિંછીયા તાલુકામાં અંદાજે ૭૦ જેટલા કર્મચારીઓ છે જેમાં ડોકટર્સ, ઓપરેટર, કોમ્યુનીટી હેલ્થ ઓફીસર સહિત કર્મચારીઓ કામ કરે છે.

જેમાં અમુક કર્મચારીઓના ત્રણ મહિનાથી અને અમુક કર્મચારીઓના બે મહિનાના પગાર થયા ન હોય આવા કર્મચારીઓને સાથી કર્મચારી એફ. બીજેથી ઉછીના - ઉધાર કરી બેછેડા ભેગા કર્યા છે.રાજકોટ જીલ્લામાં માત્ર જસદણ-વિંછીયા તાલુકાના કર્મચારીઓના પગાર નથી થયા જયારે જીલ્લાના બીજા તાલુકામાં થઇ ગયા હોય જસદણ-વિંછીયા તાલુકાના કર્મચારીઓમાં કચવાટ છવાઇ ગયો છે.આ અંગે જીલ્લાની કામગીરી સંભાળતા રાજૂભાઇ પોપટે ટેલીફોનીક વાતચીતમાં જણાવ્યું હતું કે ઉપરથી ગ્રાન્ટ ન આવી હોય પગારમાં મોડુ થયુ છે. હવે ગ્રાન્ટ આવી ગઇ છે અને ગ્રાન્ટ તાલુકામાં ફાળવાઇ ગઇ છે. સંભવીત સોમવારે અથવા મંગળવારે દરેક  કર્મચારીઓના પગાર થઇ જશે તેવી ખાત્રી આપી હતી.