Gujarati News

 આટકોટ તા. ૮ :.. આટકોટમાં ગત રાત્રે દારૂડીયાઓએ જાહેરમાં દંગલ મચાવી બેફામ સોડાની બોટલોના ઘા કરી મારામારી કરતા લોકો ઘરની બહાર દોડી આવ્યા હતા આ બનાવની જાણ આટકોટ પોલીસને થતા પોલીસ પણ તાત્કાલીક દોડી આવી હતી પરંતુ દારૂડીયાઓ નાસી ગયા હતા આ બનાવ અંગે રસીદાબેન યુસુફભાઇ સંધીએ આટકોટ પોલીસમાં ફરીયાદ દાખલ કરી છે.

પોલીસમાંથી પ્રાપ્ત  વિગતો મુજબ ગત રાત્રીના મુખ્ય બજારમાં આવેલ સંધી શેરીમાં સદામ જાનમામદ જુણેજા, અફઝલ મહેબુબ ફોગ અને તાજેતરમાં જ ખુન કેસમાં જામીન ઉપર છૂટેલા યાસીન યુસુફભાઇ સંધી દારૂની મહેફીલ માણતા હતા એ દરમિયાન કોઇ બાબતે બોલાચાલી ત્રણેય વચ્ચે હાથો-હાથની જામી પડી હતી. ત્યારબાદ બાજુમાં આવેલ પાનની બંધ દુકાનની બહાર પડેલ સોડાની ખાલી બોટલોના મુખ્ય બજારમાં સામ-સામે ઘા કરતાં આજુબાજુમાં ભારે ભય ફેલાય ગયો હતો.

આ બનાવની જાણ રસીદાબેનના નાના પુત્રએ પોલીસમાં કરતા ગુનાહીત ઇતિહાસ ધરાવતા આ શખ્સોને સબક શિખવાડવા પોલીસના ધાડા ઉતરી પડયા પરંતુ આરોપીઓ નાસી છૂટયા હતાં.

આ બનાવથી લોક-ડાઉન હોવા છતાં અમે મોડી રાત્રી હોય તો પણ લોકો ઘરની બહાર નીકળી ગયા હતાં.

પોલિસે પણ ગુનાહિત ઇતિહાસ ધરાવતા આ આરોપીને ઝડપી પાડવા કોમ્બીંગ કર્યુ હતુ પરંતુ  આરોપીઓ નાસી છૂટવામાં સફળ થયા હતાં.

આ બનાવની ફરીયાદ રસીદાબેન યુસુફભાઇ સંધીએ સદામ જાનમામદ જુણેજા અને અફજલ મહેબુબ ફોગ વિરૂધ્ધ આટકોટ પોલીસમાં દાખલ કરતા આટકોટના બીટ જમાદાર એલ. જે. મકવાણાએ વધુ તપાસ હાથ ધરી છે.