Gujarati News

રાજકોટ, તા. ૮ : જામનગર - રાજકોટ હાઈવે ઉપર રાજકોટની ભાગોળે ન્યારા ગામના પાટીયા પાસે મધરાત્રે આશરે ત્રણ વાગ્યા આસપાસ ટ્રકમાં પંકચર પડતા વ્હીલ બદલી રહેલા ટ્રકચાલક અને ખેડૂતને પથ્થરમારો કરી લૂંટ ચલાવતી હાઈવે ગેંગે લૂંટી લીધા હતા. આ ઘટનામાં પથ્થરમારાથી ઈજા પામેલા જામકલ્યાણપુરના ખેડૂત પુંજાભાઈ સોવાણીયા અને ચાલક કિશનભાઈને સરકારી હોસ્પિટલમાં સારવાર માટે ખસેડાયા હતા. આ ઘટના વખતે ખેડૂત પૂંજાભાઈનો કૌટુંબિક ભાણેજ પુનાભાઈ ભુરાભાઈ માણેક (ઉ.વ.૩૦) પણ હાજર હતો. પરંતુ ગોખણની જેમ થયેલા પથ્થરમારાથી ગભરાઈ જીવ બચાવવા નાસી છૂટ્યો હતો.

આ ઘટનામાં પૂર્વ યોજીત રીતે હાઈવે પર ખિલ્લા જેવા તિક્ષ્ણ લોખંડ ગોઠવી પંકચર પાડવામાં આવ્યુ હોવાની શકયતા છે. ઉલ્લેખનીય છે કે થોડા સમય પહેલા રાજકોટનું એક દંપતિ પડધરી નજીક જમવા ગયુ હતું ત્યારે પણ કારમાં પંકચર પડતા વ્હીલ બદલી રહ્યા હતા ત્યારે આવી જ મોડસ ઓપરેન્ડીથી લૂંટ ચલાવવામાં આવી હતી.

હોળી - ધૂળેટીના તહેવારો પૂર્વેથી લૂંટનો આ સીલસીલો જુદી જુદી જગ્યાએ ચાલુ થયો છે. પોલીસ આ લૂંટમાં આદિવાસી ગેંગ સંકળાયાનું અનુમાન લગાવી રહી છે. જો કે હજુ સુધી એક પણ બનાવનો ભેદ ખુલ્યો નથી. ગઈરાત્રે બનેલો બનાવ રાજકોટ શહેર પોલીસ કમિશ્નરેટની હદમાં બન્યો હોવાથી ગાંધીગ્રામ પોલીસ સ્ટેશનના પીએસઆઈ એમ.ડી.વાળા અને પોલીસમેન વીરભદ્રસિંહે ઈજાગ્રસ્ત ખેડૂતની ફરીયાદ પરથી ગુન્હો નોંધી અજાણ્યા શખ્સોનું પગેરૂ મેળવવા તજવીજ હાથ ધરી છે.