Gujarati News

ગોંડલઃ ગોંડલના શહેર પોલીસ સ્ટેશન ખાતે પ્રજાવત્સલ મહારાજા સર ભગવતસિંહજીનો ફોટો ઉતારી લેવાના નવા નિમાયેલા એસપી બલરામ મીણાએ આદેશ કર્યો હોવાની ચર્ચાએ જોર પકડયા બાદ આ ફોટો પરત જે તે જગ્યાએ મુકી દેવામાં આવ્યો છે.

આ અંગે ગોંડલ સીટી પોલીસ સ્ટેશનના પીઆઇ શ્રી રામાનુજે જણાવ્યું હતું કે ભગવતસિંહજીના ફોટા અંગે ગેરસમજ ઉભી થઇ હતી. જો કે ફોટો જે તે જગ્યાએ જ પરત મુકી દેવામાં આવતા વિવાદ થાળે પડી ગયો છે.

ગોંડલ પોલીસ સ્ટેશન કે આસપાસ કોઇ આ અંગે રજુઆત કરવા પણ આવ્યું નથી થોડીવાર માટે આ મુદ્દે ચર્ચા ચાલી હતી. પરંતુ હવે વિવાદ પુર્ણ થઇ ગયો છે.

આ ઘટનાની જાણ થતા ગોંડલના લોકો સીટી પોલીસ સ્ટેશને એકત્ર થઇ ગયા હોવાની પણ ચર્ચાએ જોર પકડયું હતું.

આ અંગે એસપી બલરામ મીણાનો સંપર્ક સાધવા પ્રયાસ કરતા તેઓ મળી શકયા ન હતા.