Gujarati News

રાજકોટ તા. ૩: સાવરકુંડલાના મિતીયાળા ગામે રહેતાં અને ખેત મજૂરી કરી ગુજરાન ચલાવતાં શાહિદ દીલાભાઇ ગગનીયા (ઉ. ૩૦)ને ગામના જ લાલજી રવજીભાઇ કોળી અને બે અજાણ્યાએ ઝઘડો કરી પાઇપથી માર મારતાં માથામાં ગંભીર ઇજા થતાં સારવાર માટે રાજકોટ સિવિલ હોસ્પિટલમાં ખસેડાતાં હોસ્પિટલ ચોકીના સ્ટાફે સાવરકુંડલા જાણ કરી હતી.

શાહિદના સગા કાળુશા ગગનીયાના કહેવા મુજબ ગામમાં હાલમાં પાણીની અછત હોઇ વાડીએથી પાણી ભરીને લાવવું પડે છે. શાહિદ બળદગાડામાં બેરલો મુકીને વાડીએથી ઘરે પાણી લાવ્યો હતો. આ પાણી બીજા વાસણમાં ઠાલવ્યું ત્યાં એક રખડતું કુતરૂ આવીને તેમાં પડતાં શાહિદે તેને તગડવા બડાનો એક ઘા ફટકાર્યો હતો. આ બાબતે લાલજી કોળી સહિતનાએ ડખ્ખો કરી 'કુતરાને શું કામ માર્યુ?' કહી ગાળાગાળી કરી હતી અને બીજા બે શખ્સો સાથે મળી લોખંડના પાઇપથી હુમલો કર્યો હતો.

શાહિદને માથામાં સાતેક ટાંકા આવ્યા હતાં. સવારે તેને હોસ્પિટલમાંથી રજા આપવામાં આવી હતી.