Gujarati News

રાજકોટ, તા.,ર૮: મોબાઇલ જેવડા નાના એવા વાયરલેસ સોનોગ્રાફી મશીન દ્વારા ગર્ભ પરીક્ષણ કરી આપવાના ગુન્હામાં નાસી છુટેલા મુખ્ય આરોપી ઉમેદ ઉર્ફે મુન્નો પ્યારઅલી ગીલાણી (ઉ.વ.૪૭) (રહે. નહેરૂનગર-પ, રૈયા રોડ)ને ક્રાઇમ બ્રાન્ચના પીએસઆઇ વી.જે.જાડેજાએ ઝડપી લઇ રિમાન્ડ મેળવવા તજવીજ આદરી છે.

આ પહેલા મુન્ના ઉર્ફે ઉમેદની પાર્ટનર અને નર્સીગનો બહોળો અનુભવ ધરાવતી રમા બડમલીયા અને આ બંન્નેના એજન્ટ નિતેન્દ્રસિંહ સોલંકીની ધરપકડ થઇ ચુકી છે. આ ગુન્હામાં અન્ય બેની પણ અગાઉ ધરપકડ થઇ હતી. રમા બડમલીયા મશીનરી કયાંથી આવી? તે વિષે મગનું નામ મરી પાડતી ન હતી. દરમિયાન ઝડપાયેલા ઉમેદ ઉર્ફે મુન્ના ગીલાણીની ઉલટ તપાસમાં તેને ગર્ભ પરીક્ષણનું મશીન સુરતનો દર્શન નામનો શખ્સ આપી ગયાનું જણાવ્યું છે. આ શખ્સની ઓળખાણ કોના મારફત થઇ અને કઇ રીતે મશીન મેળવ્યુ? દર્શનની પુરી ઓળખ અને સરનામું શું? સહિતના મુદ્દે રિમાન્ડ માંગવામાં આવ્યા છે. વધુ તપાસ પીએસઆઇ વનરાજસિંહ જાડેજા કરી રહયા છે.(૪.૬)