Gujarati News

રાજકોટ તા. ર૮: જન્માષ્ટમીનાં તહેવારોની મજા રંગીલા રાજકોટવાસીઓ માણી ત્યારે હવે મચ્છરોને પણ જાણે ઉત્સવ ઉજવવાની મોજ પડી છે. કેમકે આ સમય દરમિયાન મચ્છરોનો ઉપદ્રવ વધુ ફેલાયો છે અને તહેવારોની મજા માણતાં તંત્ર વાહકો આ ઉપદ્રવ ઘટાડવામાં વામણાં સાબીત થઇ રહ્યા છે અને ડેંગ્યુ-મેલેરિયાનો રોગ ફેલાઇ રહ્યો છે. બીજી  તરફ મેલેરીયા વિભાગનાં કર્મચારીઓની હડતાલ પણ યથાવત છે.

આ અંગે હડતાલ ઉપર ઉતરેલા મેલેરિયા કર્મચારીઓએ શહેરીજનો પ્રત્યે ચિંતાની લાગણી વ્યકત કરી જણાવ્યું છે કે, વરસાદ ખુબ જ સારા પ્રમાણમાં  થયો છે. એટલે બધી બાજુ઼ વરસાદી પાણી ભરાયા છે. પાણી ભરાવાથી એમાં મચ્છર ઇંડા મુકે છે. આ ઇંડામાંથી સાતમાં દિવસે એ મચ્છર થઇ ઉડી જાય છે. ચોખ્ખા પાણીમાં મચ્છર ઇંડા મુકે છે. આપણાં ઘરમાં રહેલ ફ્રિઝની પાછળની ટ્રેમાં ડેન્ગ્યુ જેવા ભયંકર મચ્છરનો જન્મ થાય છે.

આ બધી વાતો મેલેરિયા કર્મચારીઓ રાજકોટની જાહેર જનતાને રાડો પાડી પાડીને ઘરે ઘરે જઇને સમજાવે છે. જૂનથી ડિસેમ્બર સુધી એટલે કે છ માસમાં ડેન્ગ્યુના મચ્છરો થાય છે. દરમ્યાન મેલેરીયા જેવા રોગો થાય છે. આમ બારે માસ આરોગ્ય સેવાનો લાભ રાજકોટની જનતાને મળવો જોઇએ.

પણ આ રંગીલા રાજકોટની ભોળી જનતાને કયાં ખબર છે કે ર૦ લાખની વસ્તી સામે રાજકોટ મહાનગર પાલીકા પાસે તો ફકત ૭૦ માણસો જ કાયમી કામ કરે છે. બાકીના જે ર૦૦ સ્વયં સેવકો છે એ તો હડતાલ ઉપર છે અને તેઓ પાસે પણ છ માસ જ કામ કરાવે છે. ત્યારે આ બાબતે રાજકોટ મહાનગરપાલિકાના કમિશ્નર તથા આરોગ્ય ચેરમેન તથા આરોગ્ય શાખાના અધિકારીઓ કે આ ભાજપ સરકારના પદાધિકારીઓની કોઇ જ જવાબદારી નથી? તેવા સવાલો પ્રજામાં ઉઠી રહ્યા છે.