Gujarati News

રાજકોટ:દિવાળીની પૂર્વસંધ્યાએ મુખ્યમંત્રી વિજયભાઇ રૂપાણીએ સમગ્ર રાજયની જનતાને દિપાવલી પર્વની શુભેચ્છાઓ આપી હતી, અને તેમના પ્રકાશમય જીવનની કામના કરી હતી.

 મુખ્યમંત્રી રૂપાણીએ રાજકોટ રેસકોર્સ ખાતે આતશબાજીનો શુભારંભ કરાવ્યો હતો. અને આતશબાજી દ્વારા આખાયે આકાશને તથા પ્રત્યેક રાજકોટવાસીઓના જીવનને પ્રકાશિત કરવા બદલ રાજકોટ મહાનગરપાલિકાને અભિનંદન આપ્યા  હતા.  રાજયના નાગરિકોના જીવનમાં ઉજાસ પથરાયેલો રહે, તેમનું જીવન લક્ષ્મીજીની કૃપાથી મહેકતું રહે અને ગુજરાત સુખી બને, એવી મંગલ કામના મુખ્યમંત્રીએ આ પ્રસંગે પ્રફુલ્લિત સ્વરે ઉચ્ચારી હતી.

  દિવાળીનો મહોત્સવ રાજયના નાગરિકો ઉલ્લાસપૂર્વક ઉજવે અને તેમના જીવનમાં આનંદ-આનંદ છવાઇ જાય, એવા શુભાશિષ મુખ્યમંત્રીશ્રીએ તમામ નાગરિકોને પાઠવ્યા હતા. રાજકોટવાસી તરીકે મુખ્યમંત્રી વિજયભાઇએ આ પ્રસંગે ખાસ જણાવ્યું હતું કે, ‘‘આપણું રાજકોટ, રંગીલું રાજકોટ, રળિયામણું રાજકોટ’’ એ સૂત્રરાજકોટ મહાનગરપાલિકાએ ખરા અર્થમાં ચરિતાર્થ કરી બતાવ્યું છે. આ બદલ તેમણે રાજકોટ મહાનગરપાલિકાને અભિનંદન આપ્યા હતા. મુખ્યમંત્રી રૂપાણીએ ફુલઝર પેટાવી  દિવાળી ઉજવણીનો આરંભ કરાવ્યો હતો.

આતશબાજીની શરૂઆત પૂર્વે મુખ્યમંત્રી વિજયભાઇ રૂપાણીનું જિલ્લા વહીવટીતંત્ર, રાજકોટ મહાનગરપાલિકા, સ્થાનિક અગ્રણીઓ, વગેરેએ પુષ્પગુચ્છ આપી સ્વાગત કર્યું હતું.

 સ્ટેન્ડીંગ કમિટીના ચેરમેન ઉદયભાઇ કાનગડે સ્વાગત પ્રવચનમાં રાજકોટની જનતાને આતશબાજીના કાર્યક્રમ પ્રસંગે આવકારી હતી. મેયર બીનાબેન આચાર્યએ પ્રાસંગિક ઉદબોધનમાં રાજકોટ મહાનગરપાલિકા દ્વારા પ્રતિ વર્ષ યોજવામાં આવતા આતશબાજીના કાર્યક્રમની વિગતો રજૂ કરી હતી અને રેસકોર્સ રીંગ રોડ પર રંગોળી કરનાર ૮૦૦ બહેનો તથા તેમના પરિવારજનો પ્રત્યે આભારની લાગણી દર્શાવી હતી.  

  મેયર શ્રીમતિ બીનાબેન આચાર્યએ રાજકોટવાસીઓને દિવાળી પર્વની શુભકામના પાઠવી હતી, અને રેસકોર્સ રીંગ રોડ પર રંગોળી કરનાર ૮૦૦ બહેનો તથા તેમના પરિવારજનોના રાજકોટને રંગીન બનાવવા બદલ આભાર માન્યો હતો.

 રાજકોટ મહાનગરપાલિકા દ્વારા રેસકોર્સ મેદાન સ્થિત  માધવરાવ સિંધિયા ક્રિકેટ સ્ટેડિયમ ખાતે આયોજિત આતશબાજીના કાર્યક્રમમાં રાફેલ પ્લેન, નાયગ્રા  ફોલ, અશોકચક્ર, સુર્યમુખી, મેઇક ઇન ઇન્ડિયા, પામ  ટ્રી, વગેરે જેવા અવનવા ફડાકડાઓ ફોડવામાં આવ્યા હતા. અને દિવાળી પર્વની રંગારાંગ ઉજવણી કરાઇ હતી.

  આ પ્રસંગે ગુજરાત મ્યુનિસિપલ ફાઇનાન્સ બોર્ડના અધ્યક્ષ ધનસુખભાઇ ભંડેરી, સંસદસભ્ય મોહનભાઇ કુંડારિયા, ધારાસભ્યોગોવિંદભાઇ પટેલ, લાખાભાઇ સાગઠિયા તથા અરવિંદભાઇ રૈયાણી, શહેર ભા.જ.પ. અધ્યક્ષ કમલેશભાઇ  મિરાણી, ભા.જ.પ. મહિલા મોરચાના અધ્યક્ષ શ્રીમતિ અંજલિબેન રૂપાણી, અગ્રણી નીતિનભાઇ ભારદ્વાજ, ભા.જ.પ. પ્રવકતા રાજુભાઇ ધૃવ, કલેકટર રેમ્યા મોહન, પોલિસ કમિશ્નર મનોજ અગ્રવાલ, મ્યુનિસિપલ કમિશ્નર ઉદિત અગ્રવાલ, જિલ્લા વિકાસ અધિકારી અનિલ રાણાવસીયા, તથા મોટી સંખ્યામાં નગરજનો ઉપસ્થિત રહયા હતા.