Gujarati News

 રાજકોટ તા. ૨૪: સિવિલ હોસ્પિટલમાં નવનિર્મિત સુપર સ્પેશિયાલિટી બ્લોકનું ૨૮મીએ લોકાર્પણ થવા જઇ રહ્યું છે ત્યારે આ નવા બ્લોકમાં દર્દીઓને લાભ કરતી કેટકેટલી અદ્યતન સુવિધા ઉપલબ્ધ છે? તેની માહિતી તબિબી અધિક્ષક ડો. મનિષ મહેતાએ આપતાં જણાવ્યું હતું કે આ બ્લોકમાં અનેક એવી સુવિધા દર્દીઓને મળી શકશે જે અત્યાર સુધી નહોતી મળી શકતી.

ડો. મહેતાએ જણાવ્યું હતું કે આ નવા બિલ્ડીંગમાં ૪૦ બેડનો આઇસીયુ વિભાગ, ૮ મોડયુલર ઓપરેશન થિએટર (હાઇફાઇ સુવિધા સાથેના), અદ્યતન ન્યુરો સર્જરી ડિપાર્ટમેન્ટ-જેમાં ૧ કરોડના માઇક્રોસ્કોપની સુવિધા હશે. જેના કારણે અનેક ગંભીર પ્રકારની તકલીફોનું નિવારણ સરળતાથી થઇ શકશે. આ ઉપરાંત યુરોલોજીમાં લેસરની સુવિધા ઉપલબ્ધ થશે. આથી હવે પથરી સહિતના ઓપરેશનો લેસર પધ્ધતિથી થઇ શકશે. આ ઉપરાંત પ્લાસ્ટીક સર્જરી ડિપાર્ટમેન્ટ પણ છે. તેમજ ડાયાલિસીસ વિભાગમાં પણ અદ્યતન સુવિધાઓ ઉભી કરવામાં આવી છે.  તેમજ હૃદય રોગના દર્દીઓ માટે ઇકો કાડિર્યોગ્રાફીની સુવિધા પણ પ્રાપ્ત થશે. આ માટેના ૩ મશીનો આવી ગયા છે. આ ઉપરાંત અનેક સુવિધાઓ છે. સરકારે આ સુપર સ્પેશિયાલિટી વિભાગ માટે ૨૫૦ના નવા સ્ટાફની પણ મંજૂરી આપી દીધી છે. જેમાં વર્ગ એક થી વર્ગ ચારના તમામ કર્મચારીઓનો સમાવશે થાય છે. આ માટેની ભરતીઓ પણ શરૂ થશે. નવી બિલ્ડીંગમાં હોસ્પિટલના દસ સુપરસ્પેશિયાલિટી તબિબો સેવા કાર્યરત રહેશે. આમ નવો વિભાગ શરૂ થતાં દર્દીઓને એવી અનેક સુવિધા મળશે જે અત્યાર સુધી નહોતી મળતી.