Gujarati News

રાજકોટ તા. ૨૩ : કલેકટર કચેરીના ૫ કર્મચારીને કોરોના ખાબકતા ટોપ ટુ બોટમ તમામ ફફડી ઉઠયા છે.

દરમિયાન જિલ્લા મહેસૂલી કર્મચારી મંડળના પ્રમુખ શ્રી કિરીટસિંહ ઝાલા અને અન્ય આગેવાનોએ આજે કલેકટર અને એડી. કલેકટરને રૂબરૂ મળી તમામ કાર્યવાહી - અરજદારની કામગીરી ઓનલાઇન કરી નાંખવા માંગણી કરી હતી.

આગેવાનોએ રજૂઆતમાં કલેકટર કે એડી. કલેકટરને મળવું હોય તો એપોઇટમેન્ટ પણ ફરજીયાત લેવાનું કરી નાંખવા ઉપર પણ ભાર મૂકયો હતો.

આ ઉપરાંત કેસના બોર્ડ સમયે અને ખાસ કરીને ખાણ-ખનીજ ખાતામાં સૂનાવણી સમયે એક અરજદાર સાથે અન્ય ૪ થી ૫ લોકો આવતા હોય છે, તે બંધ કરાવવા પણ રજૂઆતો કરી હતી.

કર્મચારી આગેવાનોએ કલેકટર સમક્ષ કેસોની સુનાવણી સમયે જેમનો કેસ હોય તે એક જ અરજદારને આવવા દેવાની પ્રથા ગોઠવવા પણ માંગણી કરી હતી.

અત્રે એ નોંધનીય છે કે કલેકટર કચેરીના ગ્રાઉન્ડ ફલોર ઉપર તમામ બ્રાંચો કોરોનાની ઝપટે આવી ગઇ છે, એકમાત્ર રાજ્ય ચૂંટણી તંત્રની શાખા બાકી છે, આ બ્રાંચના કર્મચારીઓમાં કોરોનાના કેસોને કારણે ફફડાટ પેસી ગયો છે.