Gujarati News

રાજકોટ તા. ૧૯ : કાલાવડ રોડ પર સ્વામિનારાયણ મંદિર પાછળ આવેલ સેતુબંધ અને વૃજ વાટીકા સહીતની સોસાયટીઓના રહેવાસીઓએ પોલીસ કમિશ્નરને પોણોસોથી સો સહીઓ સાથેનું વિસ્તૃત આવેદનપત્ર પાઠવી આડેધડ પાર્કીંગની સમસ્યામાંથી છોડાવવા વિનંતી કરી છે.

આવેદનપત્રમાં જણાવેલ છે કે કાલાવડ રોડ પર આવેલ સ્વામિનારાયણ મંદિરે દર્શનાર્થે આવતા ભકતો-શ્રધ્ધાળુઓ દ્વારા મંદિરની દિવાલ પાસેથી આડેધડ પાર્કીગ કરાતુ હોય આ વાહનોની કતાર છેક આસપાસની સોસાયટીઓ સુધી લંબાય છે. પ્રેમવતી પાસેની શેરીમાં ૨૦ ફુટનો રસ્તો હોવા છતા આડેધડ વાહનોના ખડકલાથી માત્ર ૧૦ ફુટનો થઇ જાય છે.

પોલીસ કમિશ્નરશ્રી દ્વારા જુન ૨૦૧૮ માં બહાર પડાયેલ જાહેરનામા બાદ થોડા દિવસ ટ્રાફીક પોલીસ દ્વારા ધ્યાન દેવાયુ હતુ. પરંતુ બાદમાં જૈસે થે સ્થિતી થઇ ગઇ છે.ખાસ કરીને મંદિરની પાછળની દિવાલથી લઇને સેતુબંધ સોસાયટી સુધી વાહન ચાલકો આડેધડ વાહનો ઉભા રાખી દયે છે. વૃજવાટીકા સુધીના રસ્તા સાવ બ્લોક થઇ જવા જેવી સ્થિતીમાં મુકાય છે.  આ સોસાયટીની બન્ને બાજુ 'નો પાર્કીંગ ઝોન' ના બોર્ડ મુકવા તેમજ થોડા દિવસ માટે પોલીસ દ્વારા ટોઇંગ કાર્યવાહી ચાલુ રાખવામાં આવે તેવી સેતુબંધ સોસાયટી અને વૃજવાટીકા સહીતની સોસાયટીના લોકોએ માંગણી કરી છે.

સાથો સાથ સ્વામિનારાયણ મંદિર સામે આવ જા કરવા માટેનો કાલાવડ રોડ પરનો રસ્તો ડીવાડર ચણીને બંધ કરી દેવાતા તેનાથી પણ હાલાકી વધી હોવાની રજુઆત કરાઇ છે. આ સોસાયટીના લોકોને  તેમજ મહેમાનોને લાંબા અંતરનો સામનો કરવો પડે છે. રૈયા રોડ પાસે કે મહિલા કોલેજ પાસેથી મફતીયા પરામાંથી પસાર થવુ પડે છે. મફતીયાપરાની સાંકડી ગલીઓ અને પશુઓનો સામનો કરવો પડે છે.

આ તમામ બાબતો ધ્યાને લઇ સત્વરે ઉકેલ લાવવા કાલાવડ રોડ પરની સેતુબંધ અને વૃજવાટીકા તથા આસપાસની સોસાયટીના લોકોએ પોલીસ કમિશ્નરશ્રીને પાઠવાયેલઆ આવેદનપત્રમાં રજુઆત કરી છે.