Gujarati News

રાજકોટ તા. ૧૧: મોરબી રોડ પર ભગવતી હોલ તરફ જતાં રોડ પર સાંજે સાડા સાતેક વાગ્યે ટ્રક ટ્રેલરના ચાલકે બાઇકને ઉલાળતાં બાઇક ચાલક બેડીપરામાં રહેતાં જમીન મકાનના ધંધાથી કારડીયા રાજપૂત આધેડને ગંભીર ઇજા થતાં મોત નિપજતાં પરિવારમાં ગમગીની છવાઇ ગઇ છે.

પ્રાપ્ત માહિતી મુજબ બેડીપરા સિતારામ રોડ વિજય ફૂટવેરવાળી શેરીમાં રહેતાં જીતેન્દ્રભાઇ ખેંગારભાઇ પરમાર (ઉ.૪૭) પોતે જમીન મકાન લે-વેંચનું કામ કરતાં હોઇ ગત સાંજે એક ગ્રાહકને મોરબી રોડ પર જગ્યા બતાવવા ગયા હતાં. ત્યાંથી પોતે પોતાના બાઇક નં. જીજે૩બીકયુ-૬૫૯૬ હંકારી ઘર તરફ પરત આવી રહ્યા હતાં ત્યારે મોરબી રોડ ભગવતી હોલ તરફ જતાં રોડ પર ટ્રક ટ્રેલર નં. જીજે૧૨એડબલ્યુ-૦૬૯૮ના ચાલકે પાછળથી ઠોકરે લેતાં તેઓ ફંગોળાઇ જતાં છાતી-હાથના ભાગે ગંભીર ઇજાઓ થતાં સિવિલ હોસ્પિટલમાં ખસેડાયા હતાં. પરંતુ અહિ મોત નિપજ્યું હતું.

હોસ્પિટલ ચોકીના જગુભા ઝાલા અને ધીરેનભાઇ ગઢવીએ બી-ડિવીઝનમાં જાણ કરતાં પી.એસ.આઇ. એચ. જી. ગોહિલે મૃતકના કાકા પ્રવિણભાઇ હીરાભાઇ પરમાર (ઉ.૫૦)ની ફરિયાદ પરથી ટ્રક ચાલક સામે ગુનો નોંધ્યો હતો. તે અકસ્માત સર્જી પોતાનું વાહન રેઢુ મુકી ભાગી ગયો હતો.

મૃત્યુ પામનાર જીતેન્દ્રભાઇ ત્રણ ભાઇ અને બે બહેનમાં વચેટ હતાં. સંતાનમાં એક પુત્ર અને એક પુત્રી છે. આ બંનેએ પિતાની છત્રછાંયા ગુમાવતાં ગમગીની છવાઇ ગઇ છે.