Gujarati News

રાજકોટ તા. ૧૦ :.. મ્યુ. કોર્પોરેશન દ્વારા શહેરમાં વિવિધ સ્થળોએ પાર્ટી પ્લોટ બનાવવામાં આવનાર છે. આ બાબતનો નિર્ણય આવતીકાલે મળનાર બજેટની રિવ્યુ બેઠકમાં લેવાશે.

આ અંગે મેયર બીનાબેન આચાર્ય ત્થા સ્ટેન્ડીંગ કમીટી ચેરમેન ઉદયભાઇ કાનગડે સંયુકત નિવેદનમાં જણાવ્યુ હતું કે 'ચાલુ નાણાકીય વર્ષનાં બજેટમાં શહેરનાં ત્રણેય ઝોનમાં ૧-૧ પાર્ટી પ્લોટની સુવિધા ઉપલબ્ધ' બનાવવાની બજેટ જોગવાઇ કરી છે. તેનો અમલ આગામી ટૂંક સમયમાં જ શહેરનાં ત્રણેય ઝોનમાં એક-એક પાર્ટી પ્લોટ બનાવી ભાડે આપવા અંગે આવતીકાલે યોજાનાર બજેટની રિવ્યુ બેઠકમાં નિર્ણય લઇ તાત્કાલીક કામ શરૂ કરાવી દેવાશે.

આ ઉપરાંત આ રિવ્યુ બેઠકમાં કોઠારીયા રોડ વિસ્તારમાં ઓડીટોરીયમ બનાવવા ત્થા કોમ્યુનીટી હોલ બનાવવા ત્થા શહેરમાં આવેલ વિવિધ પ્રતિમાઓને સ્પોટ લાઇટથી શણગારવા, નવા સ્વીમીંગ પુલ, સહિતની બજેટ જોગવાઇઓનો અમલ કરાવવા ચર્ચા વિચારણા થશે.