Gujarati News

રાજકોટ તા. ૮ : લક્ષ્મીવાડીમાં રહેતા કડીયા વૃધ્ધ વેપારીને વ્યાજ માટે રૂ. ર૦.પ૦ લાખની ઉઘરાણી કરી ધમકી આપનાર કડીયા શખ્સની ભકિતનગર પોલીસે ધરપકડ કરી છે.  મળતી વિગત મુજબ લક્ષ્મીવાડી શેરી નં. ૧૪/૪ વૃજ નીવાસ એપાર્ટમેન્ટ ત્રીજા માળે રહેતા અને રૈયા રોડ પર હાર્ડવેરનો વ્યવસાય કરતા અનીલભાઇ મનસુખભાઇ પરમાર (કડીયા) (ઉ.૬૩) એ તેના નાના ભાઇની કેન્સરની બીમારીની સારવાર માટે મેઘદુત શાંતીલાલ પરમાર (રહે. આનંદનગર કવાર્ટર નં. એલ. ૧૮/ર૧પ કોઠારીયા મેઇન રોડ) પાસેથી રૂ. ૧ લાખ ૧૦ ટકા વ્યાજે લીધા હતાં. અનીલભાઇએ આ રકમ  ચૂકવી દીધેલ હોવા છતાં મેઘદૂત પરમાર તેના ઘરે અને જુદી - જુદી જગ્યાએ વ્યાજ સહિત રૂ. ર૦.પ૦ લાખ માંગી ગાળો આપી પ્રોમીસરી નોટ લખાવી લીધી હતી. અને ઘરે આવી અનિલભાઇના પત્ની પાસે બળજબરીથી સહીઓ  કરાવી ચાર છ ચેક લઇ લીધા હતાં. અને વ્યાજના રૂપિયા નહી આપે તો જાનથી મારી નાખવાની ધમકી  આપી ઢીકાપાટુનો માર માર્યો હતો. આ અંગે અનિલભાઇએ ગત તા. ૧૭-૧ ના રોજ ભકિતનગર પોલીસ મથકમાં ફરીયાદ નોંધાવી હતી. આ પ્રકરણમાં આનંદનગર કોલોની કવાર્ટર એલ. ૧૮/ર૦૧ માં રહેતો મેઘદુત શાંતીલાલ પરમાર (ઉ.પ૪) આગોતરા સાથે રજૂ થતા પોલીસે તેની અટકાયત કરી જામીન મુકત કર્યો છે. (પ-૧૯)