Gujarati News

રાજકોટ,તા.૫ : રાજકોટ શહરેના અયોધ્યાચોક પાસેના રાધાપાર્કમાં પિતાના ઘરે રહેતી કાજલ પોપટે (ઉ.વ.૩૨) મહિલા પોલીસમાં નોંધાવેલી ફરિયાદમાં આરોપી તરીકે તેના પતિ નિવેદિતાનગરમાં રહેતા કિસનકુમાર પોપટનું નામ આપ્યું હતું. કાજલબેને ફરિયાદમાં જણાવ્યું હતું કે, પોતે ટંકારાના મિતાણા આરોગ્ય કેન્દ્રમાં નર્સ તરીકે નોકરી કરે છે, તેના લગ્ન અઢીવર્ષ પહેલા કિશન સાથે થયા હતા, કાજલબેન નોકરી પર જતા ત્યારે તેનો પતિ તેના ચારિત્ર પર શંકા કરી ગાળો ભાંડતો હતો, પિયરમાં કાજલબેનના નામનું મકાન હોય તે મકાન વેંચી દેવા દબાણ કરતો હતો અને મકાન વેંચવાની ના કહે તો મારકૂટ કરતો હતો. નર્સ કાજલબેનને પુત્રીનો જન્મ સિઝેરિયનથી થયો હતો ત્યારે પણ પતિએ મારમાર્યો હતો. પતિ અવારનવાર મારકૂટ કરતો, કાજલબેન પિયર પણ જતા રહેતા પરંતુ સાંસારિક જીવન ટકી રહે તે માટે ફરીથી સાસરે જતા રહેતા હતા.

          ગત તા.૯ મેના કિશને ઝઘડો કરી 'તું બીજા ભાયડા કરે છેલ્લ તેમ કહી કમરપટ્ટેથી મારકૂટ કરી હતી અને ગુપ્તભાગે લાત મારી હતી, તેમજ મારી નાખવાની ધમકી આપી હતી. કિસન મારકૂટ કરતો હતો ત્યારે જ કાજલબેનનો ભાઇ ત્યાં પહોંચતા બચાવીને તેને લઇ ગયો હતો. મહિલા પોલીસે કિશન સામે ગુનો નોંધી કાર્યવાહી કરી હતી. આવા બીજી એક કિસ્સામાં થોડા દિવસો પહેલા રાજકોટમાં જમવા બાબતે પતિ પત્ની વચ્ચે વિવાદ થતા પતિએ ગુસ્સમાં આવીને પત્નીની હત્યા કરી નાખી હતી. જેમાં કુવાડવા પોલીસ સ્ટેશન વિસ્તારમાં કોહવાયેલી હાલતમાં લાશ મળી આવી હતી. જેનું પોસ્ટમોર્ટમ કરતા મહિલાના માથા અને પગના ભાગે ઈજાઓ પહોંચી હોવાનું સામે આવ્યું હતું. પહેલા તો પતિ જાણે સમગ્ર બાબતે અજાણ હોય તેવું રટણ ચાલું રાખ્યું હતું. પરંતુ પોલીસની આગવી તપાસમાં મહિલાના પતિએ જણાવ્યું હતું કે, ચાર દિવસ પહેલાં જમવા બાબતે પતિ પત્ની વચ્ચે ઝઘડો થયો હતો, જે ઝઘડામાં પત્નીએ ગાળો દેતા પતિએ પગે લાકડીઓ ફટકારી હતી એ પછી માથે પથ્થર પણ માર્યો હતો. ત્યારબાદ ત્યાંથી ચાલીને તે નીકળી ગઈ હતી. જો કે પત્ની પાછી નહીં આવતા તે પોતાની રીતે તે શોધખોળ કરતો હતો.