Gujarati News

રાજકોટ તા. ૬: પેડક રોડ પર અક્ષર હાઇટ નામથી નવા બની રહેલા એપાર્ટમેન્ટની સાઇટ પર એક આકસ્મિક બનાવમાં દાહોદની મજૂર મહિલા ઉર્મિલા વિપુલ ભુરીયા (ઉ.વ.૨૪)નું પહેલા માળેથી પડી જતાં મોત નિપજતાં મજૂર પરિવારમાં ગમગીની છવાઇ ગઇ હતી.

ઉર્મિલા તેના પતિ અને એક દિકરી સાથે કડીયા કામની સાઇટ પર રહી પતિને મજૂરીમાં મદદ કરતી હતી. ગત સાંજે તે પહેલા માળેથી કચરાનું તગારું ફેંકવા ગઇ ત્યારે સંતુલન ગુમાવતાં તગારાની સાથે પોતે પણ નીચે પટકાતાં ગંભીર ઇજા થતાં સિવિલ હોસ્પિટલમાં ખસેડાઇ હતી. પરંતુ અહિ મોત નિપજ્યું હતું. હોસ્પિટલ ચોકી મારફત જાણ થતાં બી-ડિવીઝન પોલીસ મથકના હેડકોન્સ. હિતેષભાઇ જોગડાએ જરૂરી કાર્યવાહી કરી હતી.