Gujarati News

રાજકોટઃ શેરબજારમાં ગેરકાયદેસર ચાલતા ડબ્બાના ગોરખધંધામાં એક બ્રોકરે આઠેક કરોડ રૂપિયાનું ઉઠમણું કર્યુ હોવાના અહેવાલો બહાર આવતા ખળભળાટ મચી જવા પામ્યોઃ અત્રેના હરિહર ચોક વિસ્તારમાં આવેલ એક કોમ્પલેક્ષમાં બેસીને ગેરકાયદેસર ડબ્બો ચલાવતા ધન રાશીના એક બ્રોકરે ચાર-પાંચ દિવસ પહેલા ફુલેકુ ફેરવ્યું હોવાનું તે વિસ્તારમાં જોરશોરથી ચર્ચાય રહ્યુ છે. આ બ્રોકર ઓફિસને તાળા વાસી ભૂગર્ભમાં ચાલ્યો ગયો છે. રાતોરાત પૈસાદાર થઈ જવાના સપના જોઈને આ ધંધામાં ઝંપલાવનાર અનેક લોકોએ આજે રાતા પાણીએ રોવાનો વારો આવ્યો છે. સગાસંબંધીઓ, મિત્રોના નાણા ફસાતા તેઓમાં ચિંતાનું મોજુ ફરી વળ્યુ છે. હાલ આ ધન રાશીનો શેર બ્રોકર ભૂગર્ભમાં ઉતરી ગયો છે. તે કોઈની સાથે પાર્ટનરશીપમાં ધંધો કરતો હોવાનું પણ બહાર આવ્યુ છે. શેરબજારની તાજેતરની ઉથલપાથલમાં ડબ્બા ટ્રેડીંગ કરવામાં આ બ્રોકર ફસાયો હોવાનું કહેવાય છે. આગામી દિવસોમાં હજુ કેટલાક આવા ડબ્બા ચલાવતા લોકો ફુલેકા ફેરવે તો નવાઈ નહીં.