Gujarati News

રાજકોટઃ ભારત અને બાંગ્લાદેશ વચ્ચે શરૂ થયેલી ક્રિકેટ મેચની શ્રુંખલાનો પહેલો ટી-૨૦ મેચ ગઇકાલે નવી દિલ્હીમાં રમાયો હતો. ભારતે અત્યાર સુધીના ઇતિહાસમાં બાંગ્લાદેશ સામે ૮ ટી-૨૦ મેચ રમ્યા હતાં.  આ તમામ મેચ જીત્યા હતાં. પરંતુ ગઇકાલે બાંગ્લાદેશે ભારતને હરાવી દઇ ઇતિહાસ રચ્યો હતો. હવે આ શ્રેણીનો બીજો ટી-૨૦ મેચ ૭મીએ રાજકોટના ખંઢેરી સ્ટેડિયમ સાથે રમાવાનો છે. ભારત શ્રેણીમાં ૧-૦થી પાછળ હોઇ ખંઢેરીમાં ખરાખરીનો ખેલ ખેલાશે તે નિશ્ચિત છે. બેટીંગ માટે વખણાતા ખંઢેરીના ગ્રાઉન્ડમાં ચોગ્ગા-છગ્ગાની રમઝટ બોલશે. આજે ભારત-બાંગ્લાદેશની ટીમો આજે રાજકોટ આવી પહોંચી હતી. એરપોર્ટ ખાતે બંને ટીમના કેપ્ટન અને ખેલાડીઓની એક ઝલક નિહાળવા ક્રિકેટ રસિકો મોટી સંખ્યામાં ઉમટી પડ્યા હતાં. ખેલાડીઓ એરપોર્ટમાંથી બહાર આવતાં જ ચીચીયારીઓ સાથે ચાહકોએ વધાવી લીધા હતાં. તસ્વીરોમાં ભારતીય ટીમના સુપરસ્ટાર અને હાલમાં ટી-૨૦ સિરીઝની કેપ્ટનસી સંભાળી રહેલા રોહિત શર્મા તથા બીજા સ્ટાર ખેલાડીઓ અને બાંગ્લાદેશના કેપ્ટના મહમદુલ્લા તથા બીજા ખેલાડીઓ જોઇ શકાય છે. (ફોટોઃ સંદિપ બગથરીયા)