Gujarati News

નવી દિલ્હી: કેન્દ્રીય મંત્રી હરદીપ પુરીએ રાઈઝિંગ ઈન્ડિયા સમિટ 2023ના મંચ પર કહ્યું કે, આવતા વર્ષે અયોધ્યાના રામ મંદિરમાં રામ નવમીની ઉજવણી કરવામાં આવશે. તેમણે કહ્યું કે, 496 વર્ષ પછી અયોધ્યા, જ્યાં ભગવાન રામનો જન્મ થયો હતો, રામજન્મભૂમિમાં રામ મંદિર તૈયાર થશે. કેન્દ્રીય પેટ્રોલિયમ અને કુદરતી ગેસ અને આવાસ અને શહેરી વિકાસ મંત્રી હરદીપ પુરીએ જણાવ્યું હતું કે, "આઝાદીના સમયથી જ્યારે શહેરી વસ્તી 17 ટકા હતી, 2014 સુધી શહેરી માળખાકીય સુવિધાઓની ઉપેક્ષા કરવામાં આવી હતી અને તે ગુનાહિત હતી. પુરીએ વધુમાં કહ્યું કે, શહેરી ભાગ પર જે પ્રકારનું ધ્યાન આપવાની જરૂર હતી તે હવે તે પ્રકારનું ધ્યાન આપવામાં આવી રહ્યું છે. મેટ્રો અંગે હરદીપ સિંહ પુરીએ કહ્યું કે, હાલમાં અમે વિશ્વની પાંચમી સૌથી મોટી મેટ્રો છીએ, થોડા મહિનામાં અમે ત્રીજા નંબર પર આવીશું અને આવતા વર્ષ સુધીમાં અમે અમેરિકાને પાછળ છોડીને વિશ્વની બીજી સૌથી મોટી મેટ્રોનું સંચાલન કરીશું.