Gujarati News

Gujarati News

News of Sunday, 29th November 2020

ફિલ્મ હેલ્લારોમાં અભિનય કરનારી ભૂમી પટેલનું નિધન

બોલિવૂડ બાદ ગુજરાત ફિલ્મ ઉદ્યોગને પણ આંચકો : લોકપ્રિય ફિલ્મમાં ગરબામાં ડાન્સર તરીકે ભૂમિકા નિભાવનારાં અભિનેત્રીને અનેક એવોર્ડ મળ્યા હતા

અમદાવાદ, તા.૨૮ : ૨૦૨૦નું વર્ષ વિશ્વ માટે તો ઘણું જ કપરું સાબિત થઈ જ રહ્યું છે. આ સાથે જ ગુજરાતી ફિલ્મ ઈન્ડસ્ટ્રીમાં પણ એક પછી એક માઠા સમાચાર સામે આવી રહ્યાં છે. તાજેતરમાં જ ગુજરાતી ફિલ્મ ઈન્ડસ્ટ્રીએ મહેશ-નરેશ જેવી સુપરસ્ટાર જોડીને ગુમાવી તો ત્યારબાદ થોડા દિવસો પછી આશિષ કક્કડ જેવા ટેલેન્ટેડ કલાકારને ગુમાવ્યા. હવે ફરી ગુજરાતી ફિલ્મ ઈન્ડસ્ટ્રી પર આભ તૂટી પડ્યું છે. *હેલ્લારો*માં ડાન્સર રહેલા અને પોતાની અભિનય ક્ષમતાનો પરચો આપનાર ભૂમિ પટેલના નિધનથી ગુજરાતી ફિલ્મ ઈન્ડસ્ટ્રી શોકમાં ગરકાવ થઈ છે.

નેશનલ એવોર્ડ મેળવીને દેશ-વિદેશમાં પોતાનો ડંકો વગાડનાર ફિલ્મ હેલ્લારોના સમગ્ર ટીમ મેમ્બર્સને ત્યારે આંચકો લાગ્યો હતો જ્યારે તેમને એ સમાચાર મળ્યા કે તેમની એક ટીમ મેમ્બર ભૂમિ પટેલ હવે તેમની વચ્ચે નથી રહ્યાં. હેલ્લારોમાં કામ કરનાર મુખ્ય એક્ટ્રેસિસમાંથી એક નિલમ પાંચાલે ભૂમિ પટેલને શ્રદ્ધાંજલિ પાઠવતા લખ્યું હતું કે,*બસ...દર મહિને આપણે પ્લાન બનાવતા જ રહી ગયા...અમને વિશ્વાસ નથી થતો કે તું અમારી વચ્ચે નથી. અમે તને ખૂબ જ મિસ કરીશું ભૂમિ...રીપ* આ સાથે જ તેમણે પોસ્ટમાં માહિતી આપી હતી કે ભૂમિ પટેલ છેલ્લા એક મહિનાથી કેન્સર સામે લડી રહ્યાં હતાં. હેલ્લારોમાં કામ કરનાર એક્ટ્રેસ કૌશાંબી ભટ્ટે શ્રદ્ધાંજલિ પાઠવતાં જણાવ્યું હતું કે,બહુ જ નાની ઉંમરની અને ગ્રેસફૂલ ડાન્સ કરતી ભૂમિના જવાથી ખૂબ જ દુઃખ થયું છે. ટેલેન્ટેડ અને મિલનસાર સ્વભાવ ધરાવતી ભૂમિને બ્લડ કેન્સર હોવાની માહિતી મળી હતી. તેઓ ખૂબ સારા ફાઈટર હતાં અને કેન્સર સામે લડત આપી હતી. ૨૦૨૦ ખૂબ જ ખરાબ રહ્યું છે. ભગવાન તેમના માતાપિતા અને પરિવારને આ દુઃખમાંથી બહાર નીકળવાની શક્તિ આપે. હેલ્લારોમાં ભૂમિ પટેલ સાથે કામ કરનાર ફિલ્મ એક્ટ્રેસ તરજાની ભાડલાએ દુઃખ સાથે જણાવ્યું હતું કે, મેં ભૂમિ સાથે વધારે કામ નથી કર્યું પરંતુ જેટલો સમય સાથે વિતાવ્યો છે તે ખૂબ જ યાદગાર રહ્યો હતો. આવી સારી વ્યક્તિનું આપણી વચ્ચેથી અચાનક વિદાય લેવી તે અસહ્ય છે. જ્યારે મને સમાચાર મળ્યા ત્યારે પહેલા તો માનવામાં જ ન આવ્યું એ ખૂબ જ કપરો સમય હતો.

હેલ્લારોમાં સંગીત આપનાર સંગીતકાર મેહુલ સુરતીના જણાવ્યાનુસાર, ભૂમિ પટેલ હેલ્લારોમાં ગ્રૂપ ડાન્સર હતાં. તેઓ સરળ અને સાલસ સ્વભાવના હતાં. તેમની અચાનક વિદાય થઈ તે માનવામાં જ નથી આવતું. જ્યારે અમને સમાચાર મળ્યા ત્યારે પહેલા તો વિશ્વાસ જ થતો નહોતો.' આ સાથે જ તેમણે શ્રદ્ધાંજલિ અર્પણ કરી હતી.

હેલ્લારોમાં પોતાની ડાન્સ પ્રતિભાનો પરચો આપનાર ભૂમિ પટેલને અનેક એવોર્ડ્સ પણ મળી ચૂક્યાં છે. ભૂમિ પટેલ ટેલેન્ટેડ હોવાની સાથે જ મહત્વકાંક્ષા ધરાવનાર વ્યક્તિ હતાં. તેમના સોશિયલ મીડિયા એકાઉન્ટ પરથી જ એ વાતની સાબિતી મળે છે. તેમના એકાઉન્ટમાં એવોર્ડ્સની તસવીર શૅર કરીને ભૂમિ પટેલે એવું લખ્યું હતું કે મેની મોર ટૂ કમ... જોકે, તેમની ઈચ્છા પૂરી થાય એ પહેલા જ તેમણે અલવિદા કહ્યું હતું. જેથી સાથી કલાકારો ગમગીન છે. ભૂમિ પટેલને 'એક્સલન્સ ઈન કલ્ચરલ એક્ટિવિટીઝ ૨૦૧૧-૧૨', ગરબા અને ફોક ડાન્સ માટે એવોર્ડ, ડ્રામા રનર અપ, એક્સલન્ટ અચિવમેન્ટ ૨૦૧૩ સહિતના અનેક એવોર્ડ મળ્યા હતાં.

(12:00 am IST)
  • દેશમાં કોરોનાથી રિકવર થનારની સંખ્યા 88 લાખને પાર પહોંચી : રાત્રે 11 વાગ્યા સુધીમાં કોરોનાના નવા 41,465 કેસ નોંધાયા:કુલ કેસનો આંકડો 93,92,689 થયો :એક્ટીવ કેસ 4, 52, 960 થયા: વધુ 41,974 દર્દીઓ સ્વસ્થ થતા કુલ 88,00,860 રિકવર થયા :વધુ 482 લોકોના મોત સાથે કુલ મૃત્યુઆંક 1,36,720 થયો access_time 12:04 am IST

  • ઇસ્લામાબાદમાં ફ્રેન્ચ દૂતાવાસમાં આગનું છમકલું : પાકિસ્તાનની રાજધાની ઇસ્લામાબાદમાં ફ્રેન્ચ દૂતાવાસમાં આગ લાગવાની ઘટના બંધ છે સ્થાનિક ચેનલના કહેવા મુજબ આગને તુરત જ ઠારી દેવામાં આવી હતી અને આગ કાબૂમાં આવી ગઈ છે. access_time 10:28 am IST

  • દેશમાં કોરોનાના કેસનો કુલ આંકડો 94 લાખને પાર પહોંચ્યો : મૃત્યુઆંક 1.37 લાખથી વધુ :રાત્રે 11 વાગ્યા સુધીમાં કોરોનાના નવા 37,685 કેસ નોંધાયા:કુલ કેસની સંખ્યા 94, 30,724 થઇ :એક્ટીવ કેસ 4,46,658 થયા : વધુ 43,590 દર્દીઓ સ્વસ્થ થતા કુલ 88,44,751 રિકવર થયા :વધુ 419 લોકોના મોત સાથે કુલ મૃત્યુઆંક 1,37,152 થયો access_time 12:08 am IST