Gujarati News

મુંબઈ:મુંબઈમાં અદાણીના આવ્યા બાદ લાઈટબિલમાં તોતિંગ વધારો થતા ઉહાપો મચી જવા પામ્યો છે અચાનક લાઈટ બિલ વધી જતા લોકોમાં રોષ ફેલાયો છે અને લોકો સોશ્યલ મીડિયામાં મારફત પોતાની ફરિયાદ વ્યક્ત કરી રહ્યાં છે અદાણીએ જ્યારથી મુંબઈમાં પાવર ડિસ્ટ્રિબ્યુશન શરુ કર્યું છે, ત્યારથી લોકો પોતાના લાઈટ બિલ રાતોરાત 50 ટકા જેટલા વધી ગયા હોવાની ફરિયાદ કરી રહ્યા છે. કોંગ્રેસ તેમજ મુંબઈના લોકો સોશિયલ મીડિયા પર આક્ષેપ કરી રહ્યા છે કે અદાણીના આવ્યા પછી ઓક્ટોબર મહિનાનું બિલ ખાસ્સું વધારે આવ્યું છે.

  જોકે, આ અંગે અદાણીનું કહેવું છે કે તેની વિરુદ્ધ અપપ્રચાર કરાઈ રહ્યો છે.કંપનીનો દાવો છે કે, તેણે કામકાજ શરુ કર્યું તે પહેલા અગાઉની કંપનીએ પિટિશન ફાઈલ કરી હતી અને તેના આધારે વીજળીના ટેરિફ વધ્યા છે, એટલું જ નહીં જે ગાળામાં બિલની રકમ વધી ગઈ હોવાની ફરિયાદ છે તે દરમિયાન વીજળીનો વપરાશ પણ 18 ટકા જેટલો વધ્યો છે.
  અદાણી ઈલેક્ટ્રિસિટી સર્કલ હેઠળ આવતા મુંબઈના વિસ્તારોમાં અગાઉ અનિલ અંબાણીની માલિકીની રિલાયન્સ ઈન્ફ્રાસ્ટ્રક્ચર વીજળી પૂરી પાડતી હતી જોકે, રિલાયન્સે પોતાનો બિઝનેસ અદાણીને વેચી દીધો છે. કોંગ્રેસના નેતા સંજય નિરુપમે અદાણી ગ્રાહકો પાસેથી લૂંટ ચલાવતી હોવાના આક્ષેપ કરી આખા શહેરમાં તેના પોસ્ટર લગાવી દીધા છે.
  અદાણીના પ્રવકતાએ જણાવ્યું હતું કે, ‘રાજકીય પક્ષના વરિષ્ઠ નેતા દ્વારા કંપની વિરુદ્ધ ભ્રામક પ્રચાર કરાઈ રહ્યો છે. તેઓ ‘લૂંટ’ જેવા બિનજવાબદાર શબ્દોનો ઉપયોગ કરી વિવિધ માધ્યમો દ્વારા આક્ષેપો કરી રહ્યા છે. ટેરિફમાં જે વધારો થયો છે તે જાહેર સુનાવણી બાદ MERC દ્વારા કરાયો હતો. કંપની પર જે આક્ષેપ કરાયા છે તે પાયાવિહોણા અને ખોટા છે.
 રિલાયન્સ પાસેથી પાવર ડિસ્ટ્રિબ્યુશનની કામગીરી સંભાળ્યા બાદ અદાણીએ સપ્ટેમ્બરથી ગ્રાહકોને પોતાના બિલ મોકલવાના શરુ કર્યા હતા. ત્યારથી જ લોકો પોતાના બિલની રકમ વધી ગઈ હોવાની ફરિયાદો કરી રહ્યા છે. કેટલાક લોકોને સપ્ટેમ્બરનું બિલ વધુ આવ્યું છે. જોકે, તેના માટે કંપનીએ મીટર રીડિંગમાં ભૂલ થયાનું જણાવી બીજા બિલમાં રકમ એડજસ્ટ કરી આપવાનું કહ્યું હતું. બે ગ્રાહકોએ બીજા બિલમાં રકમ એડજસ્ટ થઈ ગઈ હોવાનું પણ  જણાવ્યું હતું.
 જોકે, કેટલાક ગ્રાહકો સોશિયલ મીડિયામાં ફરિયાદ કરી રહ્યા છે કે તેમની બિલની રકમ અચાનક વધી ગઈ છે. કેટલાક એવું પણ કહી રહ્યા છે કે બે જ મહિનામાં બિલની રકમ ડબલ થઈ ગઈ છે, પરંતુ અદાણી આવું કંઈ થયું હોવાનો સ્પષ્ટ ઈનકાર કરી રહી છે. કંપનીનું કહેવું છે કે ઓક્ટોબરમાં મુંબઈમાં ગરમી વધી જતી હોવાથી ઈલેક્ટ્રિસિટીનો વપરાશ પણ વધી જાય છે, એટલે બિલ પણ વધુ આવે છે.