Gujarati News

ભોપાલ, તા.૨૯: મધ્ય પ્રદેશના ભોપાલમાં ફેમિલી કોર્ટના કાઉન્સિલર એક આશ્યર્યજનક કેસમાં ગૂંચવાઈ ગયા છે. અહીં એક દંપતી દારુ પીવાને લઈને પરેશાન છે. મોટાભાગે તો એવું જ જોવા મળે છે કે, પતિની દારુ પીવાની આદતને લઈને પત્નીઓ પરેશાન રહે છે, પણ અહીં તો કેસ જ કંઈક ઉલટો છે. આ કેસમાં પતિ ઈચ્છે છે કે તેની પત્ની બીજે કયાંય નહીં તો ફેમિલી ફંકશન પૂરતું તો દારુ પીવાનું શરૂ કરે, જયારે બીજા સભ્યો દારૂ પીતા હોય છે.

કાઉન્સિલર શૈલ અવસ્થીએ કહ્યું કે, 'આ ઘણો અલગ મામલો છે અને આ પ્રકારનો કેસ મેં પહેલી વખત સાંભળ્યો છે. આ એક મિડલ કલાસ ફેમિલી છે, વધુ પૈસાદાર નથી અને પતિ પ્રાઈવેટ જોબ કરે છે. પતિનો આખો પરિવાર, તેની મા, પિતા, ભાઈ-બહેન, ભત્રીજા બધાને ફેમિલી ફંકશનમાં દારુ પીવાનું પસંદ છે, પરંતુ પત્નીને તે દારુ પીવો નથી ગમતો.'

શરૂઆતમાં બધું બરાબર ચાલ્યું, પરંતુ ધીરે-ધીરે સારરિયાંએ મહિલા પર દારુ પીવા અને તેમને કંપની આપવા દબાણ શરૂ કરી દીધું. તેનો વિરોધ કરવા પર વિવાદ શરૂ થઈ ગયો. કાઉન્સિલરે એમ પણ જણાવ્યુ કે, આ કોઈ નવપરિણીત જોડું ન હતું, તેમના ત્રણ બાળકો પણ હતા, જેમની ઉંમર ૯,૬ અને ૪ વર્ષ હતી. તેમની વચ્ચે વિવાદ લગ્નના થોડા સમય બાદથી જ ચાલી રહ્યો હતો, પરંતુ દરરોજ સમસ્યા વધતી જતા તેઓ હવે કાઉન્સિલરની મદદ લઈ રહ્યા છે.

શૈલ અવસ્થીએ જણાવ્યું કે, 'આ મામલામાં વિવાદ થવા પર પત્ની અવાર-નવાર બાળકોને લઈને પિયર જતી રહેતી હતી. તેને દારુને હાથ લગાડવાનો પણ ઈનકાર કરી દીધો, કેમકે તેના પરિવારમાં કોઈપણ તેનું સેવન નથી કરતું. પરંતુ તેણે પતિને દારુ છોડવા ન કહ્યું, કેમકે તેને લાગે છે કે, તે તેના પતિના પરિવારની સંસ્કૃતિનો ભાગ છે. જોકે, પાર્ટીમાં વહુનું માત્ર સોફ્ટ ડ્રિંક કે જયૂસ પીવાનું સાસરિંયાંઓને ન ગમ્યું. વર્ષો વીતતા ગયા તેમ વિવાદ વધતો ગયો કેમકે સાસુ દારુ પીતી હતી અને વહુને પણ કંપની આપવા કહેતી હતી, પરંતુ જયારે તેણે ના પાડી દીધી તો બધા નારાજ થઈ ગયા.'

મહિલાએ પોતાનો પક્ષ રાખતા કહ્યું કે, તેને દારુ પીવાનું પસંદ નથી અને એ એવું પણ નથી ઈચ્છતી કે તેના બાળકો વિચારે કે તેને દારુની લત છે આ કારણે દંપતીએ કાઉન્સિલરની મદદ લેવાનો વિચાર કર્યો, કેમકે મામલો હાથમાંથી જતો રહ્યો હતો અને બંનેમાંથી કોઈપણ પાર્ટી સમજૂતીના પક્ષમાં ન હતી. કાઉન્સિલરે પતિ અને તેના પરિવારને સમજાવવાનો પ્રયાસ કર્યો કે, જો પત્નીને પસંદ નથી તો દારુ પીવા માટે તેના પર દબાણ ન કરે.