Gujarati News

અમદાવાદઃ રાજસ્થાનના ડુંગરપુરની નિવાસી 15 વર્ષીય કિશોરી સાથે તેના પિતાના પિતરાઈ ભાઈ અને અન્ય ચાર સંબંધીઓએ અમદાવાદ ખાતે દુષ્કર્મ આચર્યું હતું. સગીરાના કાકા ચેતન કુબેરજી ડામોર(45)એ સગીરાની માતાને કહ્યું હતું કે જો તમારી દીકરીને મારી પાસે અમદાવાદ મોકલશો તો તાત્કાલીક કામ પર લગાવી દઈશ જેથી કામની લાલચે સગીરા 17મી ઓક્ટોબરના રોજ માતા પાસેથી રુપિયા 400 લઈને અમદાવાદ આવવા નીકળી હતી.

અમદાવાદ બોલાવી અને પછી જે કર્યું

18મી તારીખે અમદાવાદ પહોંચ્યા બાદ તેના કાકાને ફોન કરતા તેમણે અન્ય એક સબંધી લેવા આવશે તેમ કહીને ધનરાજ ડામોર(28) યુવાન વેજલપુરથી સગીરના લેવા માટે મોકલ્યો હતો. સગીરાને લેવા ધનરાજ અને તેના અન્ય બે સંબંધીઓ વાલસંગ ડામોર(25) અને હડિયા પ્રભુ ડામોર(28) સગીરાને લઈને તેના કાકા ચેતનના ઘરે પહોંચ્યા હતા.

જેમ તેમ કરીને સગીરા પરત રાજસ્થાન પોતાના ગામમાં પહોંચી

વેજલપુર પોલિસ સ્ટેશનના અધિકારીએ જણાવ્યું કે, ‘ચેતનના ઘરે પહોચ્યા બાદ થોડીવાર બધાએ સગીરા સાથે વાતચીત કર્યા બાદ ધીરે ધીરે તેનું છેડતી શરુ કરી હતી. તેથી હાજર રહેલા નરાધમોનો ઇરાદો પારખી ગયેલી સગીરાએ બચવા માટે પ્રયાસ કર્યા હતા પરંતુ ચારેય નરાધમોએ જોર અપનાવી તેની સાથે દુષ્કર્મ આચર્યું હતું.’ દુષ્કર્મ આચર્યા બાદ નરાધમોએ ધમકી આપી હતી કે જો આ અંગે કોઈને પણ વાત કરશે તો ખૂબ જ ગંભીર પરિણામ ભોગવવા પડશે.

વેજલપુર પોલીસે કરી 4 પૈકી 2ની ધરપકડ

ઘટનાથી ડરી ગયેલી સગીરા જેમ તેમ હિંમત ભેગી કરીને પોતાના ઘરે ડુંગરપુર પરત ફરી હતી અને સમગ્ર હકીકત પોતાની માતાને જણાવી હતી. જે બાદ પરિવાર સ્થાનિક પોલિસ સ્ટેશનમાં ફરિયાદ લખાવવા પહોંચ્યો હતો. બુધવારે કરેલી ફરિયાદ વેજલપુર પોલિસ સ્ટેશનમાં ટ્રાન્સફર કરવામાં આવી હતી. વેજલપુર પીઆઈ એ.યુ. તાપરિયાએ કહ્યું કે, ‘મુખ્ય આરોપી સગીરાના કાકા અને ધનરાજની ધરપકડ કરવામાં આવી છે જ્યારે અન્ય બે વ્યક્તિઓ દુષ્કર્મ આચર્યા બાદ રાજસ્થાન ભાગી ગયા હતા. અપરાધીઓ સામે પોક્સો અને દુષ્કર્મનો ગુનો નોંધવામાં આવ્યો છે.’