Gujarati News

નવી દિલ્હી તા. ૨૭ : લદ્દાખની મુલાકાત લઈ આવ્યા બાદ આર્મી ચીફ જનરલ એમ.એમ. નરવણેએ દેશની ટોચની નેતાગીરીને સરહદની તમામ સ્થિતિથી માહિતગાર કર્યા હતા અને સૈન્ય દળો તરફથી વિશ્વાસ દર્શાવ્યો હતો કે સરહદ પર એવી તૈયારી રાખવામાં આવી છે જેથી જો ચીન કોઈપણ પગલું ભરશે તો તેને ઇંટનો જવાબ પથ્થરથી આપવા માટે સક્ષમ છે. જાણવા મળ્યા મુજબ લદ્દાખથી પરત આવ્યા બાદ સેનાધ્યક્ષે વડાપ્રધાન મોદી પૂર્વ લદ્દાખની તમામ જાણકારી આપી હતી. જે બાદ શુક્રવારે પણ સેનાધ્યક્ષ અને સંરક્ષણ પ્રધાન રાજનાથ સિંહ વચ્ચે બેઠક યોજાઈ હતી.

સૂત્રો મુજબ ભલે હાલ ચીનની સેનાએ LACના કેટલાક વિસ્તારો ખાસ કરીને સ્ટ્રેટેજીકલી મહત્વના એવા દૌલત બેગ ઓલ્ડી, દેપસાંગ વિસ્તારમાં પોતાના સૈનિકોનો અને શસ્ત્રોનો ભારે જમાવડો કર્યો હોય પરંતુ તે હાલ આક્રમણભર્યું કોઈ ઉતાવળનું પગલું ભરવાની ભૂલ કરશે નહીં.

જોકે ભારતે પણ આ બાજુ પૂરતી તૈયારી કરી લીધી છે. ભારતે આ વિસ્તારમાં ૧૦-૧૨ હજાર જેટલા વધારાના જવાનો અને ટેન્ક રેજીમેન્ટ, હોવિત્ઝર તોપ, એરફોર્સની સુખોઈ-૩૦ અને મીગ-૨૯ની સ્કવોડ્રોન ને તહેનાત કરી દીધી છે. તેમજ સેનાને પૂર્ણ યુદ્ઘ સ્તરના હાઈ એલર્ટ પર તૈયાર રાખવામાં આવી છે. સૂત્રોએ કહ્યું કે, પહેલા કરતા હવે આપણે સરહદી વિસ્તારમાં વધુ સૈનિકો અને મજબૂત માળખાગત સુવિધા સાથે સજ્જ છીએ. જેને જોતા હાલ બની શકે કે ચીન કોઈ આક્રમક પગલું ભરે નહીં.

પરંતુ સૂત્રો એ વાતને નકારી રહ્યા નથી કે નાના-મોટા છમકલા નહીં થાય. સૂત્રો મુજબ પેંગોંગ ત્સો અને ગલવાન વેલી વિસ્તારમાં ખૂબ જ ભારે સંખ્યામાં ભારત અને ચીનના સૈનિકો આમને સામને છે તેવી સ્થિતિમાં નાના-મોટા છમકલા થઈ શકે છે. જોકે ભારત પહેલ નહીં કરે તે વાતની પણ સૈન્યે ખાતરી આપી છે. પણ જો ચીન કોઈ અવળચંડાઈ કરશે તો પૂરતો જવાબ દેવામાં આવશે.

જયારે ચીન ગલવાલ વેલીમાં પેટ્રોલિંગ પોઇન્ટ ૧૪ જયાં તારીખ ૧૫ જૂને બંને દેશોના સૈનિકો વચ્ચે ઝડપ થઈ હતી ત્યાં હજુ પણ આક્રમક બની રહ્યું છે. અહીં ચીન માગણી કરી રહ્યું છે કે ભારતીય સૈનિકો શ્યોક અને ગલવાન નદીને પાર ન કરે. તેવી જ રીતે PLA સૈનિકો ફિંગર-૪ અને ફિંગર ૮ વિસ્તારમાં કે જે પોંગોંગ ત્સો લેકના ઉત્તરની તરફ પહાડી વિસ્તાર છે ત્યાં પણ સૈન્ય માટે માળખાગત સુવિધા અને બંકર બનાવી રહ્યા છે જેથી ઉંચાઈ પરથી વિસ્તાર પર પ્રભુત્વ રાખી શકાય. જોકે ભારતીય આર્મીએ સ્પષ્ટ કરી દીધું છે કે બંનેમાંથી કોઈપણ વિસ્તારમાં ચીનને એક પણ પગલું આગળ વધવા દેવામાં આવશે નહીં અને એપ્રિલ માસ પહેલા જે સ્થિતિ હતી તે મુજબ રહેવા માટે ભારત ભાર આપી રહ્યું છે.

સૂત્રો એ કહ્યું કે હાલ તો અહીં ન તો સૈનિકો આમને સામને લડી રહ્યા છે ન તો સૈન્ય ઓછું કરવામાં આવી રહ્યું છે. આ સ્થિતિ આગામી કેટલાક મહિના સુધી રહી શકે છે. હાલની સ્થિતિમાં ફકત વેઇટ એન્ડ વોચ કરવી જ હિતાવર છે. ચીન પોતાની વિસ્તારવાદી નીતિને લઈને LACને ભારત તરફ ધકેલવા માટે પ્રયાસ કરી શકે છે. પરંતુ ભારત તરફથી પ્રતિકારના પગલે સૈન્યબળ અજમાવવા માટે ચીને હજુ વધુ તૈયારી કરવી પડે જે હાલ જોવા મળતી નથી.