Gujarati News

નવી દિલ્હી, તા.૨૭: કેન્દ્ર સરકારના વટહુકમ ઉપર રાષ્ટ્રપતિ રામ નાથ કોવિંદના હસ્તાક્ષર બાદ હવે ૧૫૪૦ સહકારી બેંકો અને મલ્ટી-સ્ટેટ કો-ઓપરેટિવ બેંકો રિઝર્વ બેંકના કાર્યક્ષેત્રમાં આવી છે. મોદી સરકારના આ નવા નિયમ બાદ ૮ કરોડ ૬૦ લાખ ખાતાધારકોની થાપણ સલામત રહેશે.

આ તમામ બેંકો રિઝર્વ બેંકની દેખરેખ હેઠળ આવી ગઇ છે. આ તમામ બેંકિંગ નિયમો સહકારી બેંકો પર લાગુ થશે. ચાલો આપણે જાણીએ કે સરકારના આ હુકમની બેંકના ગ્રાહકો પર કેવી અસર પડશે ...

રિઝર્વ બેંકને આધિન આવ્યા બાદ આ બેંકોએ પણ આરબીઆઈના નિયમોનું પાલન કરવું પડશે, જેનાથી દેશની નાણાકીય નીતિ સફળ બનાવામાં સરળતા રહેશે.

આ બેંકોએ પણ તેમની કેટલીક મૂડી કેન્દ્રિય બેંક પાસે જમા રાખવાની રહેશે.આવી સ્થિતિમાં, તેમના ડૂબી જવાની સંભાવના ઓછી થશે. તો વળી, રિઝર્વ બેંક સહકારી બેંકોના નાણાં કયા ક્ષેત્ર માટે ફાળવવા જોઈએ તે નક્કી કરશે.

જો કોઈ બેંક હવે ડિફોલ્ટ થાય છે, તો બેંકમાં ૫ લાખ રૂપિયા સુધીની રકમ જમા કરવામાં આવે છે તે સંપૂર્ણ સલામત છે. જો બેંક ડૂબી જાય અથવા નાદાર થઈ જાય, તો તેમાં જમા કરાવનારાઓને તેમના ખાતામાંની રકમ ધ્યાનમાં લીધા વિના મહત્તમ ૫ લાખ રૂપિયા મળશે.

જો તમારી પાસે સમાન બેંકની ઘણી શાખાઓમાં એકાઉન્ટ છે, તો પછી તમામ ખાતાઓમાં જમાં નાણાં અને વ્યાજની રકમ ઉમેરવામાં આવશે અને ફકત ૫ લાખ સુધીની થાપણ સલામત ગણવામાં આવશે.

રાજય સહકારી મંડળીઓ અધિનિયમ મુજબ ગ્રામીણ વિસ્તારોમાં ખેતી અને ધિરાણ સુવિધાઓ આપતી સહકારી બેંકોની સ્થાપના કરવામાં આવે છે. તેમનું રજીસ્ટ્રેશન સહકારી મંડળીઓના રજિસ્ટ્રાર પાસે કરાવવામાં આવે છે.

ગામો, નગરો અથવા નગરોમાં પ્રાથમિક સહકારી ક્રેડિટ સમિતિઓની સ્થાપના કરવામાં આવે છે જે સહકારી બેંક દ્વારા ખેડુતો, કારીગરો મજૂરો કે દુકાનદારોને લોન આપે છે. ત્યાં જ, જિલ્લા સહકારી બેંક, રાજય સહકારી બેંક અને જમીન વિકાસ બેંક પણ સહકારી બેંકો છે.