Gujarati News

ઝારખંડઃ ઝારખંડમાં તબીબોના કાળા કરતૂતનો કિસ્સો સામે આવ્યો છે. જેમાં ખોટી રીતે લિંગ પરીક્ષણ કર્યા બાદ પુત્ર અવતરતા ભુલ છૂપાવવા માટે બાળકનું લિંગ કાપી નાખવામાં આવતા બાળકનું મોત નિપજ્યુ હતું.

શિશુના માતા-પિતાએ ડૉક્ટર્સ વિરુદ્ધ પોલીસ ફરિયાદ નોંધાવી છે. આ ઘટનાને ગંભીરતાથી લઇ સ્વાસ્થ્ય સચિવે તપાસની સાથે ચિકિત્સકો વિરુદ્ધ સખત કાર્યવાહી કરવાના નિર્દેશ જાહેર કર્યો છે.

ચતરા જિલ્લાના ઇટખોરી બ્લોકમાં આ ઘટના બની હતી. ઓમ ક્લીનિકમાં જ નવજાત શિશુનું મૃત્યુ થયું હતું. મંગળવારે રાત્રે આઠ મહિનાની ગર્ભવતી જય પ્રકાશ નગર નિવાસી ગુડિયા દેવી 110 કિમી દૂર ચેકઅપ માટે હોસ્પિટલે આવી હતી. જ્યાં ડોક્ટરોએ અલ્ટ્રાસાઉન્ડ રિપોર્ટ તો બનાવ્યો હતો પણ તે ખોટો નીકળતાં એવી નીચ હરકત કરી જેનાથી માણસાઇ પરથી ભરોસો ઉડી જાય.

પોલીસ મુજબ પૈસા પડાવવા માટે ડૉક્ટરોએ બોગસ અલ્ટ્રાસાઉન્ડ રિપોર્ટ બનાવ્યો હતો. રિપોર્ટમાં દીકરી હોવાની વાત કહી. પરંતુ ડિલિવરી દરમિયાન દીકરો અવતર્યો હતો. ત્યારે અલ્ટ્રાસાઉન્ડ રિપોર્ટ બોગસ છે તે છતું ન થાય તે માટે તબીબોએ નવજાતનું લિંગ જ કાપી નાખ્યું. બાદમાં ડૉક્ટરોએ માતાને કહ્યું કે એક વિકૃત છોકરીનો જન્મ થયો છે, જે જન્મના થોડા સમયમાં જ મૃત્યુ પામી.

ચિકિત્સકોના જવાબથી અસંતુષ્ટ મા-બાપે બુધવારે તેમના વિરુદ્ધ પોલીસ ફરિયાદ નોંધાવી. પોલીસ ક્લિનિક પર પહોંચી ત્યારે ડૉક્ટર અહીંથી ગાયબ થઇ ગયા હતા. મા-બાપની ફરિયાદના આધારે પોલીસે આરોપી ડૉક્ટરો વિરુદ્ધ આપીસીની ધારા 302 અંતર્ગત કેસ દાખલ કર્યો. ડૉક્ટરોની ધરપકડ માટે તજવીજ હાથ ધરવામાં આવી છે. બીજી બાજુ રાજ્યના સ્વાસ્થ્ય સચિવ નિધિ ખરેએસિવિલ સર્જનને બંને આરોપી ચિકિત્સકો વિરુદ્ધ કાર્યવાહી કરવાના આદેશ આપી દીધા છે. કહ્યું કે, એમની વિરુદ્ધ ક્લિનિકલ ઇસ્ટાબ્લિશમેન્ટ એક્ટ, પીસીપીએનડીસી એક્ટ અને મેડિકલ પ્રેક્ટિશનર એક્ટ અંતર્ગત કાર્યવાહી કરવામાં આવે. નિધિ ખરેએ કહ્યું કે “આ બહુ ભયાનક ગુનો છે. ચિકિત્સકો વિરુદ્ધ આકરી કાર્યવાહીનો આદેશ આપી દેવામાં આવ્યો છે. આગામી ત્રણ મહિનામાં લિંગ તપાસ કરનારાઓ વિરુદ્ધ સખ્ત કાર્યવાહી થશે.”