Gujarati News

કોલકાતા, તા.૨૫: પશ્ચિમ બંગાળની મુખ્યમંત્રી મમતા બેનર્જી અનેકવાર વિપક્ષ પર હુમલો કરતાં જોવા મળતા હોય છે. પોતાના વિરોધીઓ પર આક્રમક હુમલાઓ કરનારી મમતા બેનર્જીને પેઇન્ટિંગનો શોખ છે. થોડા દિવસો પહેલા એક વીડિયો પણ સામે આવ્યો હતો જેમાં તેઓ પિયાનો વગાડી રહ્યા હતાં. ગુરુવારે તેઓ કોલકાતામાં બંગ્લા સંગીત મેળા ૨૦૨૦માં હિસ્સો લેવા પહોંચ્યા. અહીં તેમણે ઉત્સાહભેર મેળામાં ભાગ લીધો ઉપરાંત બીજેપી સામે નિવેદન આપતાં કહ્યું કે ગુજરાતના વિકાસ મોડલને બંગાળમાં કયારેય પ્રવેશ નહીં મળે.

કલા અને સંગીતની પ્રેમી મમતા પોતાને સંગીતના તાલે નાચતા રોકી ન શકયા. આ દરમિયાન સંગીત મેળામાં આદિવાસી સંગીતકાર હેમ્બ્રમ પુરસ્કાર લેવા પહોંચ્યા. તે સમયે હેમ્બ્રમ એક સંગીત પર ડાન્સ કરી રહી હતી. ત્યારે મમતા બેનર્જીએ તેમનો હાથ પકડીને નાચવાનું શરૂ કરી દીધું.

આ દરમિયાન પોતાના ભાષણમાં મમતા બેનર્જીએ એકતાનું આહ્વાન કર્યું અને કહ્યું કે બંગાળને ગુજરાત નહીં બનવા દેવાય. મમતાએ બીજેપીના દાવા પર કટાક્ષ કરતાં કહ્યું કે, ગુજરાતના વિકાસ મોડલને બંગાળમાં કયારેય એન્ટ્રી નહીં મળે.

બેનર્જીએ કહ્યું કે, રાષ્ટ્રગીત, રાષ્ટ્રીય ગીત અને જય હિંદના નારા સમગ્ર દુનિયાને બંગાળે આપ્યા. TMC નેતાએ કહ્યું કે, નેતાજીએ આપણને જય હિંદ આપ્યું જે વિશ્વ પ્રસિદ્ઘ છે. બંકિમચંદ્રએ રાષ્ટ્રીય ગીત વંદે માતરમ અને રવીન્ર્રનાથ ટાગોરે આપણને રાષ્ટ્રગીત આપ્યું. આ તમામ બંગાળની ધરતીથી આવ્યા છે. જોકે બંગાળને બદનામ કરવાનો પ્રયાસ કઠિન છે, પરંતુ મારું માનવું છે કે એક દિવસ, સમગ્ર દુનિયા બંગાળને સલામ કરશે. નોબેલ પુરસ્કારથી લઈને બાકી બધું બંગાળથી છે. અમે બંગાળને ગુજરાત નહીં બનવા દઈએ.