Gujarati News

નવી દિલ્હી: વડાપ્રધાન નરેન્દ્ર મોદીએ સોમવારે ચીફ જસ્ટિસ એનવી રમન્ના અને વિપક્ષ નેતા અધીર રંજન ચૌધરીની સાથે એક મહત્વની બેઠક યોજી હતી. આ બેઠક નવા CBI ચીફની પસંદગી માટે યોજાઈ હતી. 90 મિનિટ ચાલેલી આ બેઠકમાં આ પદ માટે રેસમાં સામેલ ઉમેદવારોને શૉર્ટ લિસ્ટ કરવાના હતા. આ દરમિયાન CJI રમન્નાએ એક જરૂરી નિયમ યાદ કરાવ્યો. જેના પગલે 2 નામ રેસમાંથી બહાર નીકળી ગયા.

મીડિયા રિપોર્ટ મુજબ, CJIએ બેઠકમાં 6 મંથ રૂલનો આધાર આપ્યો હતો. CJIએ સુપ્રીમ કોર્ટના ચૂકાદાનો ઉલ્લેખ કરતા કહ્યું હતું કે, નવા ડિરેક્ટરની પસંદગીમાં 6 મહિનાના નિયમનું પાલન જરૂર થવું જોઈએ. આ નિયમ મુજબ, જે અધિકારીઓનો કાર્યકાળ 6 મહિનાથી ઓછો બચ્યો છે, તેમના માટે ચીફ પોસ્ટનો વિચાર ના કરવો જોઈએ.

બેઠકમાં CJIની વાતનું વિપક્ષ નેતા અધીર રંજને સમર્થન કર્યું. 3 સભ્યોની પેનલમાં બે લોકોના સમર્થનથી આ નિયમ પર વિચાર કરવામાં આવ્યો અને અંતે બે નામો CBI ડિરેક્ટરની રેસમાંથી બહાર થઈ ગયા. જેમાં BSF ચીફ રાકેસ અસ્થાના સામેલ છે, જે 31 ઓગસ્ટે નિવૃત થઈ રહ્યાં છે. આ સિવાય 31મીં મેના રોજ નિવૃત થઈ રહેલા NIA ચીફ વાયસી મોદીના નામનો પણ વિચાર પડતો મૂકવામાં આવ્યો છે. આ પદ પર આ બે નામો જ પ્રબળ દાવેદાર માનવામાં આવતા હતા.

હવે CBIના સૌથી મોટા પદ માટે 3 નામો શૉર્ટ લિસ્ટ થયા છે. જેમાં મહારાષ્ટ્રના પૂર્વ DGP સુબોધકુમાર જયસ્વાલ, સશસ્ત્ર સીમા બળના ડિરેક્ટર કેઆર ચંદ્ર અને ગૃહમંત્રાલયના વિશેષ સચિવ વીએસકે કૌમુદી. આ ત્રણેય નામોમાં સુબોધકુમાર જયસ્વાલનું નામ સૌથી આગળ છે.

ઉલ્લેખનીય છે કે, મોદી, અધીર રંજન અને સીજેઆઈ વચ્ચેની આ બેઠક 4 મહિના પહેલા થવાની હતી, પરંતુ અગમ્ય કારણોસર આ બેઠક નહતી થઈ શકી. અધીર રંજને કોઈ નામ પર વાંધો તો નથી ઉઠાવ્યો, પરંતુ તેમણે કહ્યું કે, કેન્ડિડેટ્સની પંસદગીમાં સરકારનું વલણ બેદરકારી ભરેલું રહ્યું છે. આ પોસ્ટ માટે તેમને 11મીં મેના રોજ 109 નામોની યાદી મળી હતી. સોમવારે 1 વાગ્યે આ યાદી 10 નામની થઈ ગઈ અને સાંજે 4 વાગ્યે 6 નામ બચ્યા.

CBI ડિરેક્ટરની પોસ્ટ ફેબ્રુઆરી મહિનાથી ખાલી છે. ફેબ્રુઆરી સુધી આ પોસ્ટ પર ઋષિકુમાર શુક્લ હતા. જેમના બાદ પ્રવિણ સિન્હાને CBIના વચગાળાના પ્રમુખ બનાવાયા છે. આ પોસ્ટ માટે સૌથી વરિષ્ઠ IPS એટલે કે 1984 થી 1987ની બેંચના ઑફિસરોના નામો પર વિચાર કરવામાં આવે છે.