Gujarati News

શિવગંગા, તા. ૨૩ : તમિલનાડુના શિવગંગા જિલ્લામાં લોકોએ માનવીયતાનું ઉદાહરણ પૂરું પાડ્યું છે. અહીં એક પક્ષી અને તેના બચ્ચાં માટે આખું ગામ એક મહિના કરતા વધારે દિવસ અંધારામાં રહ્યું. વાત જાણે એમ છે કે ગામડાની સ્ટ્રીટ લાઈટ જે સ્વિચ બોર્ડથી ચાલતી હતી ત્યાં એક પક્ષીએ માળો બાંધ્યો અને ઈંડા પણ મુક્યા હતા. ગામડાના લોકોએ એવો નિર્ણય લીધો કે જ્યાં સુધી ઈંડામાંથી બચ્ચાં બહાર આવે નહીં ત્યાં સુધી તેઓ આ સ્વિચબોર્ડનો પ્રયોગ નહીં કરે.

તમિલનાડુના પોથાકુડી ગામમાં રહેતા કરૂપ્પુરાજાએ જણાવ્યું કે ગામમાં કુલ ૩૫ ર્સ્ટ્રીટલાઈટ છે. આ સ્ટ્રીટલાઈટમાં એક કોમન સ્વિચ બોર્ડ છે. આ સ્વિચબોર્ડ તેમના ઘરની બહાર લગાવવામાં આવ્યું છે. દરરોજ સાંજે અંધારુંં થયા પછી તેઓ આ સ્વિચબોર્ડ ચાલુ કરતા હતા અને ગામની સ્ટ્રીટલાઈટ ચાલુ થઈ જતી હતી.

કરૂપ્પુરાજાએ જણાવ્યું કે લોકડાઉનની શરૂઆતમાં એક દિવસ જોયું તો આ સ્વિચબોર્ડની અંદર એક પક્ષીએ માળો બાંધ્યો હતો. આ માળામાં લીલા અને વાદળી રંગના ઈંડા મૂક્યા હતા. મેં આ પક્ષી અને તેના માળા-ઈંડા વિશેની માહિતી ગામના સભ્યોને જણાવી. ત્યારે ગામના સભ્યોએ એવો નિર્ણય લીધો કે જ્યાં સુધી આ ઈંડામાંથી બચ્ચાં બહાર આવીને મોટા થાય નહીં ત્યાં સુધી તેઓ ગામની સ્ટ્રીટ લાઈટ ચાલુ કરશે નહીં. આ ગામના સભ્યોએ દરેક ઘરમાં જઈને આ વિશેની જાણકારી આપી અને લોકોને રાજી કરી લીધા. ગામના ઘણાં સભ્યોએ આ વાતનો વિરોધ કર્યો અને એક પક્ષી તેમજ તેના ઈંડા માટે થઈને આખા ગામને અંધારામાં રાખવાના નિર્ણયને મૂર્ખતા ગણાવી. પણ, બેઠક બાદ ગામના તમામ લોકો સ્ટ્રીટલાઈટ બંધ રાખવાના મુદ્દે રાજી થઈ ગયા.