પૂર્વ પીએમ મનમોહન સિંહે ક્યારેય એવું નથી કહ્યું કે દેશના સંસાધનો પર પહેલો અધિકાર મુસ્લિમોનો છે:રાશિદ અલ્વી

News of Tuesday, 23rd April 2024

પૂર્વ પીએમ મનમોહન સિંહે ક્યારેય એવું નથી કહ્યું કે દેશના સંસાધનો પર પહેલો અધિકાર મુસ્લિમોનો છે:રાશિદ અલ્વી

ભાજપ નેતાઓની કાગારોળ વચ્ચે રાશિદ અલ્વીનો પલટવાર :કહ્યું -મનમોહન સિંહ હંમેશા કહેતા આવ્યા છે કે જે લોકો સમાજમાં પાછળ ઊભા છે, જેઓ સૌથી ગરીબ અને સૌથી પછાત છે,તેમને યોગ્ય હક્ક મળવો જોઈએ

કોંગ્રેસ નેતા રાશિદ અલ્વીએ મુસ્લિમોને લઈને વડાપ્રધાન મોદીના નિવેદન પર વળતો પ્રહાર કર્યો છે. રાશિદ અલ્વીએ કહ્યું કે પૂર્વ વડાપ્રધાન મનમોહન સિંહે ક્યારેય એવું નથી કહ્યું કે દેશના સંસાધન પર પહેલો અધિકાર મુસ્લિમોનો છે. રાશિદ અલ્વીએ કહ્યું કે મનમોહન સિંહે હંમેશા કહ્યું છે કે જે લોકો સમાજમાં છેલ્લી હરોળમાં ઉભા છે, જેઓ સૌથી ગરીબ અને સૌથી પછાત છે, તેમનો દેશના સંસાધન પર ચોક્કસ અધિકાર છે. આ સાથે રાશિદ અલ્વીએ એમ પણ કહ્યું કે એમાં કોઈ શંકા નથી કે દેશના મુસ્લિમો હજુ પણ પાછળની હરોળમાં ઉભા છે. દેશના મુસ્લિમો હજુ પણ ખૂબ પછાત છે, તેથી મનમોહન સિંહનું નિવેદન ખોટું નથી. તેમણે કહ્યું કે મનમોહન સિંહે હંમેશા કહ્યું છે કે સમાજના સૌથી પછાત લોકોને આગળ લાવવા માટે તેમને તેમનો યોગ્ય અધિકાર મળવો જોઈએ. ખાસ વાતચીતમાં કોંગ્રેસના નેતા રાશિદ અલ્વીએ પણ કહ્યું કે જો પછાત લોકોને આગળ નહીં લાવવામાં આવે તો દેશ ક્યારેય મજબૂત નહીં બની શકે. તેમણે કહ્યું કે જ્યારે પછાત લોકો આગળ આવશે ત્યારે જ સમાજમાં સમાનતા આવશે અને દેશનો પણ વિકાસ થશે. આ સાથે રાશિદ અલ્વીએ કેન્દ્ર સરકાર અને ભાજપ પર પણ જોરદાર પ્રહારો કર્યા છે. તેમણે કહ્યું કે આજે ભાજપ માત્ર અમીરોને જુએ છે અને ગરીબો પર ધ્યાન નથી આપતી. તેઓ ગરીબોની જરૂરિયાતો જોઈ શકતા નથી. તાજેતરમાં જ કોંગ્રેસના ચૂંટણી ઢંઢેરા પર પ્રહાર કરતા વડાપ્રધાન મોદીએ પૂર્વ વડાપ્રધાન મનમોહન સિંહના 2006ના નિવેદનનો ઉલ્લેખ કર્યો હતો. તેમણે કહ્યું હતું કે કોંગ્રેસનો ઢંઢેરો શહેરી નક્સલીઓની વિચારસરણીને વધુ પ્રોત્સાહન આપવા જઈ રહ્યો છે. મનમોહન સિંહના નિવેદનનો ઉલ્લેખ કરતા વડાપ્રધાન મોદીએ કહ્યું હતું કે જો કોંગ્રેસ સત્તામાં આવશે તો દેશની મિલકતો ઘૂસણખોરોને આપવામાં આવશે. તેમણે કહ્યું કે મનમોહન સિંહે કહ્યું હતું કે દેશની સંપત્તિ પર પહેલો અધિકાર મુસ્લિમોનો છે.