Gujarati News

નવી દિલ્‍હી તા. ૨૧ : જયારે તમે ટ્રેનમાં મુસાફરી કરવા માટે ઓનલાઈન અથવા ઓફલાઈન રિઝર્વેશન કરાવો છો, ત્‍યારે તમને એસી ઈકોનોમી ક્‍લાસનો વિકલ્‍પ મળશે નહીં. રેલવે મંત્રાલયે આ વર્ગના કોચને સરેન્‍ડર કરવાનો નિર્ણય લીધો છે. આ કોચ પણ હવે સામાન્‍ય થર્ડ એસી કોચ હશે.

રેલ્‍વે મંત્રાલયે ગયા વર્ષે સ્‍લીપર અને એસી થર્ડ ક્‍લાસ વચ્‍ચે આ વર્ગ શરૂ કર્યો હતો. જેનું ભાડું સ્‍લીપર કરતાં વધુ પણ થર્ડ એસી કરતાં ઓછું હતું. તેનો હેતુ સ્‍લીપરમાં મુસાફરી કરતા મુસાફરોને એસીમાં મુસાફરી કરવાનો હતો. આ માટે કોચમાં બર્થની સંખ્‍યા વધારવામાં આવી હતી. સામાન્‍ય થર્ડ એસી ક્‍લાસ કોચમાં ૭૨ બર્થ હોય છે, જયારે તેમાં ૮૩ બર્થ હોય છે.

આ સાથે, આ કોચમાં વાંચવા માટે વ્‍યક્‍તિગત લાઇટ, એસી વેન્‍ટ્‍સ, યુએસબી પોઈન્‍ટ્‍સ, દરેક બર્થ પર મોબાઈલ ચાર્જિંગ પોઈન્‍ટ્‍સ, ઉપરની બર્થ પર ચઢવા માટે વધુ સારી સીડી અને ખાસ નાસ્‍તાના ટેબલો બનાવવામાં આવ્‍યા હતા.

રેલ્‍વે મંત્રાલયના જણાવ્‍યા અનુસાર, બર્થની સંખ્‍યા વધારવા માટે, સીટો વચ્‍ચે થોડો ગેપ રાખીને લેનન (ધાબળો) સ્‍ટોરેજ દૂર કરવામાં આવ્‍યો હતો. આ કારણોસર, લેનનને એસી ઇકોનોમીમાં આપવામાં આવ્‍યું ન હતું. અધિકારીઓના જણાવ્‍યા અનુસાર, આ ક્‍લાસમાં મુસાફરી કરતા મુસાફરો સતત ધાબળાની માંગ કરી રહ્યા હતા, મુસાફરોની દલીલ હતી કે સામાન્‍ય રીતે એસી ક્‍લાસના મુસાફરો ધાબળા સાથે મુસાફરી કરતા નથી. મુસાફરોની માંગને ધ્‍યાનમાં રાખીને, ભૂતકાળમાં, રેલ્‍વેએ આ શ્રેણીના મુસાફરોને પણ લેનન આપવાનું શરૂ કર્યું છે.

રેલ્‍વે મંત્રાલય અનુસાર, સરેરાશ એક લેનનો ખર્ચ પ્રતિ ટ્રીપ ૬૦ થી ૭૦ રૂપિયા છે. આમાં નિર્ધારિત સમય પછી ધોવાથી લઈને દૂર કરવા સુધીની દરેક વસ્‍તુનો સમાવેશ થાય છે. આ કોચમાં મુસાફરી કરતા મુસાફરોને લેનન આપીને રેલવે વધારાનો બોજ ઉઠાવી રહી હતી. જેના કારણે રેલ્‍વેએ એસી ઈકોનોમીને સરેન્‍ડર કરવાનો નિર્ણય લીધો છે. હાલમાં ૪૬૩ એસી ઇકોનોમી ક્‍લાસ અને ૧૧૨૭૭ થર્ડ એસી કોચ છે. પરંતુ હવે બંને વર્ગના કોચની સંખ્‍યા વધીને ૧૧૭૪૦ થઈ ગઈ છે.