Gujarati News

નવી દિલ્હી :એક્સિસ બેન્કની રીન્યુઅલ સહિતની બેન્ક ગેરેન્ટી નહિ સ્વીકારવા સરકારે તમામ ટેલિકોમ કંપનીઓ, સંગઠનો અને ટેલિકોમ મંત્રાલયના અધિકારીઓને આદેશ આપ્યો છે ભારતની આ ત્રીજા ક્રમની ખાનગી બેન્ક અગાઉ આવી એક ગેરન્ટીના નિયમનું પાલન કરવામાં નિષ્ફળ ગઈ હતી, જેથી ‘વિશ્વાસનો ગંભીરપણે ભંગ’ થયો હતો એમ સરકારે જણાવ્યું છે.

   એક્સિસ બેન્ક અગાઉ એરસેલ ગ્રૂપ ઓફ કંપનીઝ વતી પોતે જ ઇશ્યૂ કરેલી બેન્ક ગેરન્ટીના નિયમોનું પાલન કરવામાં નિષ્ફળ ગઈ હતી એમ ડિપાર્ટમેન્ટ ઓફ ટેલિકોમ્યુનિકેશન્સ (DoT)એ 16 માર્ચે આપેલા આદેશમાં જણાવ્યું હતું.

   DoTએ જણાવ્યું હતું કે, એક્સિસ બેન્કના આ પગલાથી વિશ્વાસનો અને સરકાર સાથેના કોન્ટ્રાક્ટનો ભંગ થયો છે. આ બાબતને ધ્યાનમાં રાખતાં,તમને બધાને એક્સિસ બેન્ક તરફથી રિન્યુઅલ સહિતની કોઈ નવી બેન્ક ગેરન્ટી નહીં સ્વીકારવાની સૂચના આપવામાં આવે છે.

  જવાબમાં એક્સિસ બેન્કે જણાવ્યું હતું કે, જે બેન્ક ગેરન્ટી સામે સવાલ છે તે ભારતી એરટેલ (એરસેલ નહીં) વતી ઇશ્યૂ કરવામાં આવી હતી અને ટેલિકોમ ટ્રિબ્યુનલે જે ગેરન્ટી આપવામાં આવી હતી તેના પર સ્ટે મૂક્યો હતો.એક વખત આ સ્ટે હટી જશે એટલે બેન્ક ગેરન્ટી છૂટી કરશે અને નિયમનું પાલન કરશે. બેન્ક ગેરન્ટીમાં કેટલી રકમ છે તે જાહેર કરવામાં આવી નથી.

   જોકે, સૂત્રોએ જણાવ્યું હતું કે, ભારતી એરટેલે 2016માં એરસેલ પાસેથી સ્પેક્ટ્રમ ખરીદ્યું હતું અને બેન્કે એરટેલ વતી સરકારને બેન્ક ગેરન્ટી ઇશ્યૂ કરી હતી આ અંગે એરટેલે મોડી સાંજ સુધી પણ કોઈ પ્રતિક્રિયા આપી નહોતી

  અત્રે ઉલ્લેખનીય છે કે, ટેલિકોમ કંપનીઓ કોન્ટ્રાક્ટ્સના નિયમનું પાલન કરવા માટે નિયમિતપણે બેન્ક ગેરન્ટી આપે છે, કારણ કે જો કંપની નિયમભંગ કરે તો સરકાર આ ગેરન્ટી વટાવી શકે.