Gujarati News

નવી દિલ્હી: અગ્નિપથ યોજનાનો વિરોધ કરી રહેલા સશસ્ત્ર દળોના ઉમેદવારો દ્વારા આપવામાં આવેલા આજના ભારત બંધના એલાન પહેલા કેટલાક રાજ્યોમાં સાવચેતીના પગલાં લેવામાં આવી રહ્યા છે. સરકારે આ યોજના પાછી ખેંચવાની ના પાડી દીધી છે. અહેવાલ મુજબ, સશસ્ત્ર દળોમાં ટૂંકા ગાળાની ભરતી માટે કેન્દ્રની ‘અગ્નિપથ’ યોજના સામે દેશના વિવિધ ભાગોમાં વિરોધને કારણે 700 ટ્રેનો રદ કરવામાં આવી છે.

ઉત્તર પ્રદેશના મુરાદાબાદ રેલ્વે વિભાગમાંથી પસાર થતી 30 ટ્રેનો રદ કરવામાં આવી છે. ઉત્તર રેલવે, મુરાદાબાદ ડિવિઝનમાંથી ઉપડતી અને પસાર થતી ટ્રેનો રદ કરવામાં આવી છે.

અહેવાલ મુજબ, ‘અગ્નિપથ’ યોજનાના વિરોધમાં દેશના વિવિધ ભાગોમાં વિરોધને કારણે ભારતીય રેલ્વેએ સોમવારે 700 ટ્રેનોને રદ કરવાની, 28 ટ્રેનોમાં ફેરફાર કરવાની અને 22ને ટૂંકી કરવાની જાહેરાત કરી છે. અનેક સંગઠનોએ આ યોજનાના વિરોધમાં સોમવારે ભારત બંધનું પણ આહ્વાન કર્યું છે. મેન્ટેનન્સ અને ઓપરેશનલ કારણોસર કેટલીક ટ્રેનો પણ રદ કરવામાં આવી છે.

જણાવી દઈએ કે અગ્નિપથ યોજનાના વિરોધને કારણે 19 જૂન, રવિવારના રોજ 483 ટ્રેન સેવાઓ રદ કરવામાં આવી હતી. અધિકારીઓના જણાવ્યા અનુસાર, રેલ્વેએ આંદોલનને કારણે 229 મેલ/એક્સપ્રેસ ટ્રેનો અને 254 પેસેન્જર ટ્રેનો રદ કરી છે. તેમજ 8 મેલ/એક્સપ્રેસ ટ્રેનો આંશિક રીતે રદ કરવામાં આવી હતી.

રેલવેએ મુસાફરોની સુવિધા માટે રદ કરાયેલી ટ્રેનોની યાદી વેબસાઈટ પર અપલોડ કરી છે. રાષ્ટ્રીય પરિવહનકર્તાએ મુસાફરોને તેમની મુસાફરીનું આયોજન કરતા પહેલા https://enquiry.indianrail.gov.in/mntes અથવા NTES એપની મુલાકાત લઈને ટ્રેનની વિગતો તપાસવા વિનંતી કરી છે.