Gujarati News

નવી દિલ્હી : આ ઉનાળાની ઋતુમાં ભારતીય રેલ્વે રેલ પ્રવાસીઓની સુવિધા માટે અને મુસાફરોના વધારાના ધસારાને તેમના નક્કી કરેલા સ્થાનો પર લઈ જવા માટે આ વર્ષે 380 વિશેષ ટ્રેનોની 6369 ટ્રીપ કરશે. ભારતીય રેલ્વે આ વર્ષે 2022 (348 ટ્રેનોની 4599 ટ્રીપ્સ)માં દોડાવવામાં આવેલી કુલ સમર સ્પેશિયલ ટ્રેનો કરતાં વધુ 1770 ટ્રિપ્સ ચલાવશે. ગયા ઉનાળામાં જ્યાં પ્રતિ સ્પેશિયલ ટ્રેન સરેરાશ 13.2 ટ્રિપ્સ કરવામાં આવતી હતી, આ વર્ષે સ્પેશિયલ ટ્રેન દીઠ 16.8 ટ્રિપ્સ કરવામાં આવશે.

આ વિશેષ ટ્રેનો પટના-સિકંદરાબાદ, પટના-યસવંતપુર, બરૌની -મુઝફ્ફરપુર, દિલ્હી-પટના, નવી દિલ્હી-કટરા, ચંદીગઢ-ગોરખપુર, આનંદ વિહાર-પટના, વિસાપટનમ -પુરી-હાવડા, મુંબઈ-પટના, મુંબઈ- ગોરખપુર જેવા મુખ્ય સ્થળોને જોડે છે.

કુલ મળીને, 380 વિશેષ ટ્રેનો જે 6369 ટ્રીપ કરશે તેમાં 25,794 જનરલ કોચ અને 55,243 સ્લીપર કોચ હશે. જ્યારે સામાન્ય વર્ગના કોચમાં 100 મુસાફરોની બેઠક ક્ષમતા હશે, જ્યારે સ્લીપર કોચમાં ICFમાં 72 મુસાફરો અને LHBમાં 78 મુસાફરોની ક્ષમતા હશે.

 મુસાફરોની વધતી સંખ્યાને તેમના નક્કી કરેલા સ્થાને લઈ જવા માટે દેશભરમાં ફેલાયેલા રેલ્વે વિભાગોએ વિશેષ ટ્રેનો ચલાવવાની તૈયારી કરી છે. આ વિશેષ ટ્રેનો દ્વારા કર્ણાટક, આંધ્રપ્રદેશ, તેલંગાણા, મહારાષ્ટ્ર, ઓડિશા, પશ્ચિમ બંગાળ, બિહાર, ઉત્તર પ્રદેશ, દિલ્હી જેવા વિવિધ રાજ્યો સાથે કનેક્ટિવિટી સુનિશ્ચિત કરવામાં આવી રહી છે.

મુખ્યત્વે કર્ણાટક પ્રદેશમાં સેવા આપતી દક્ષિણ પશ્ચિમ રેલ્વે આ ઉનાળામાં સૌથી વધુ 1790 ટ્રીપો ચલાવશે. જે ગયા વર્ષે 779 ટ્રીપો હતી જ્યારે પશ્ચિમ રેલ્વે મુખ્યત્વે ગુજરાત રાજ્યમાં સેવા આપતી આ ઉનાળામાં 1470 ટ્રીપો ચલાવશે જે ગયા વર્ષે 438 ટ્રીપો હતી. એ ઉલ્લેખ કરવો પણ જરૂરી છે કે આ વર્ષે દક્ષિણ મધ્ય રેલવે 784 ટ્રિપ્સ ચલાવી રહી છે જે ગયા વર્ષની સરખામણીમાં 80 ટ્રિપ્સ વધુ છે. દેશના ઉત્તર ભાગમાં મુસાફરોના ભારે ધસારાને ધ્યાનમાં રાખીને ઉત્તર પશ્ચિમ રેલવે સ્પેશિયલ ટ્રેનોની 400 ટ્રિપ કરશે, જ્યારે પૂર્વ મધ્ય રેલવે 380 ટ્રિપ કરશે. ઉત્તર રેલવેની પણ આ વર્ષે 324 ટ્રીપ કરવાની યોજના છે.