Gujarati News

લંડન, તા., ૧૯: ભારતમાં બેઠા-બેઠા છેતરપીંડીબાજો  લંડનના લોકો પાસેથી ટેકસની પેનલ્ટી અને જેલ સજા સુધીની ધમકી આપી બ્રિટનના રેવન્યુ એન્ડ કસ્ટમ્સના પ્રતિનિધિ તરીકે ઓળખ આપી લાખ્ખો રૂપીયા ખંખેરી લે છે. આવી રીતે દરરોજ ૧૦ હજાર લોકોને ફોન કોલ્સ કરવામાં આવે છે. છેલ્લા ૬ મહિનામાં હર મેજીસ્ટીસ રેવન્યુ એન્ડ કસ્ટમ્સ (બ્રીટન) પાસે ટેકસના નામે થયેલી છેતરપીંડીની  ૩૩૦ ફરીયાદો નોંધાઇ છે. ઘણા લોકોએ પોતાના પાસેથી ઓનલાઇન થયેલું ઉઘરાણું સતાવાળાઓએ કર્યાનું સમજી હજારો-લાખ્ખો રૂપીયા ચુકવી આપ્યા છે. ડેઇલી મેઇલ ડોટ કોમના ટોમ કેલીએ આ માટે પોતાની વેબસાઇટ ઉપર છેતરાયેલા લોકોને માહતી આપવા અપીલ કરી છે.

ખુણે-ખાચરે ઓફીસોમાં બેસી ભારતમાંથી હર મેજીસ્ટીસ રેવન્યુ એન્ડ કસ્ટમ્સ (એચએમઆરસી) ના નામે દરરોજના ૧૦ હજાર લોકોને મુરખ બનાવવામાં આવે છે. ભોગ બનનારને એવું કહેવામાં આવે છે કે 'તેઓએ ટેકસ ચોરી કરી છે, જો કાયદાકીય કાર્યવાહી અને જેલથી બચવા માંગતા હો તો તાત્કાલીક આટલા ડોલર કે આટલા પાઉન્ડ જે તે એકાઉન્ટમાં જમા કરાવો'... આવી ધમકી સતાવાળાઓએ આપ્યાનું સમજી લોકો ફટાફટ પૈસા જમા કરાવી દે છે અને  ભેજાબાજો  પોતાના ગજવા ગરમ કરી લે છે. ભારતના આવા બોગસ કોલ સેન્ટરો  જુદી-જુદી રીતે છેતરપીંડી કરે છે. ઘણા લોકો બેંક પેમેન્ટ કે લોનના રીપેમેન્ટ માટે ધમકાવી નાણા પડાવી લે છે. આ લોકો બ્રિટનના ફોન નંબર મેળવી એચએમઆરસીના ફોન નંબર પણ કોપી કરી લેતા હોય છે જેને લઇને સામેની વ્યકિતના ડીસપ્લે ઉપર ઓફીશ્યલ નંબરો ફલેશ થવાના કારણે તેમની પાસેથી થઇ રહેલી ઉઘરાણી સરકારી વિભાગ દ્વારા  થતી હોવાનું જલ્દીથી લોકોને ગળે ઉતરી જતું હોય છે.એફબીઆઇએ ભારતને આ બારામાં પગલા લેવા પણ જણાવાયું છે. લંડનની ઓથોરીટીએ અમદાવાદ સ્થિત ગેંગની તમામ માહીતી ભારતની પોલીસને પણ ફોરવર્ડ કરી હોવાનું રીપોર્ટમાં જણાવાયું છે.