Gujarati News

નવી દિલ્હી તા. ૧૭: રિઝર્વ બેન્કે સાત દિવસ ર૪ કલાક કામ કરનાર નેશનલ ઇલેકટ્રોનિકસ ફંડ ટ્રાન્સફર (નેફટ) સિસ્ટમ શરૂ કરી દીધી છે. આ સિસ્ટમ લાગુ થોવાની સાથે પ્રથમ આઠ કલાકમાં રૂ. ૧૧.૪૦ લાખના ટ્રાન્ઝેકશન થયા હતા. આ સિસ્ટમ રવિવાર-સોમવારની મધરાતે શરૂ કરાઇ હતી. આરબીઆઇના જણાવ્યા અનુસાર તેના દ્વારા હવે કોઇપણ સમયે ઇલેકટ્રોનિક મોડ દ્વારા નાણાં ટ્રાન્સફર કરી શકાશે.

આ સાથે ભારત એવા ચુનંદા દેશોમાં સામેલ થઇ ગયું છે, જયાં સાતેય દિવસ ર૪ કલાક કોઇપણ રકમ ટ્રાન્સફર કરી શકાય છે. આરબીઆઇના નિવેદન અનુસાર મોડી રાતે ૧ર વાગ્યાથી સવારે ૮ વાગ્યા સુધી કુલ ૧૧.૪૦ લાખના ટ્રાન્ઝેકશન થયા હતા.

આરબીઆઇએ જણાવ્યું છે કે સાતેય દિવસ ર૪ કલાક નેફટ સુવિધા ઉપલબ્ધ કરાવવાનો હેતુ પ્રત્યેક ભારતીયને ઇ-પેમેન્ટના વિવિધ માધ્યમ દ્વારા સશકત બનાવવાનો છે. નેફટ એક ઓનલાઇન ટ્રાન્ઝેકશન મોડ છે, જેમાં તમે એક જ સમયે રૂ. બે લાખ સુધીની રકમ ઓનલાઇન ટ્રાન્સફર કરી શકો છો.

અત્યાર સુધી નેફટ ટ્રાન્ઝેકશન સામાન્ય દિવસોમાં સવારે ૮ થી સાંજે ૭ દરમિયાન અને પહેલા અને ત્રીજા શનિવારે સવારે ૮ થી બપોરે ૧ વાગ્યા સુધી કરી શકાતું હતું. પરંતુ હવે ર૪ કલાક આ ટ્રાન્ઝેકશમન કરી શકાશે.