Gujarati News

નવી દિલ્‍હી, તા.૧૭: ભારતીય રેલ્‍વે દ્વારા મુસાફરી હવે વધુ સરળ બનશે. IRCTC દ્વારા નવું આયોજન કરવામાં આવી રહ્યું છે. જો ભારતીય રેલવે દ્વારા આ પગલું લેવામાં આવશે તો કન્‍ફર્મ ટિકિટ સરળતાથી મળી જશે. આ સિવાય ટ્રેનની ટિકિટ બુક કરવાના નિયમોમાં પણ ફેરફાર થશે. એક રિપોર્ટ અનુસાર, ભારતીય રેલ્‍વે ટૂંક સમયમાં ટિકિટ દલાલોના બ્‍લેક માર્કેટિંગ પર કડક કાર્યવાહી કરવા જઈ રહી છે.

આ પગલા સાથે, દરેકને કન્‍ફર્મ ટિકિટ મળે અને ટિકિટિંગ નેટવર્કને દલાલોથી મુક્‍ત કરી શકાય તે સુનિ?તિ કરવાનો રેલવેનો પ્રયાસ રહેશે. ઝી બિઝનેસના એક અહેવાલ મુજબ, સરકાર ટિકિટોના જથ્‍થાબંધ બુકિંગ પર નજર રાખી રહી છે, જેમાં એક સાથે અનેક ટિકિટ બુક કરાવનારા દલાલો દ્વારા બ્‍લેક માર્કેટિંગ કરવામાં આવી રહ્યું છે. રિપોર્ટમાં એમ પણ કહેવામાં આવ્‍યું છે કે બ્‍લેક માર્કેટિંગને રોકવા માટે દલાલોએ ટ્રેનની ટિકિટ બુક કરવાનું બંધ કરવું જરૂરી છે. આનાથી ટિકિટનું બ્‍લેક માર્કેટિંગ અટકશે.

ઝી બિઝનેસના સૂત્રોના જણાવ્‍યા અનુસાર ભારતીય રેલવે તેના ટિકિટ બુકિંગના નિયમોમાં ફેરફાર કરી શકે છે. આ ફેરફાર હેઠળ ભારતીય રેલવે કોલ દ્વારા ટિકિટ બુકિંગ કન્‍ફર્મ કરશે. આ સાથે પ્રવાસની વિગતો, ગંતવ્‍ય સ્‍થાન, બુકિંગની પદ્ધતિ વગેરે વિશે પણ માહિતી માંગી શકાય છે અને તે પછી ટિકિટ બુકિંગ કન્‍ફર્મ કરી શકાય છે.

આ ફેરફારથી ટીકીટનું બ્‍લેક માર્કેટીંગ તો અટકશે જ પરંતુ દલાલોને પકડવામાં પણ સરળતા રહેશે. તે જ સમયે, યુપી, બિહાર, દિલ્‍હી, પંજાબ, હરિયાણા જેવા રાજ્‍યોમાં, ટ્રેન મુસાફરો પર ધ્‍યાન કેન્‍દ્રિત કરવામાં આવશે.

હાલમાં જ રેલવે દ્વારા ટિકિટ બુકિંગના નિયમોમાં મોટો ફેરફાર કરવામાં આવ્‍યો છે. આ અંતર્ગત હવે ૧૨ને બદલે ૨૪ ટ્રેન ટિકિટ એક મહિનામાં એક IRCTC યુઝરને બુક કરવાની મંજૂરી આપવામાં આવી છે, પરંતુ IRCTC એકાઉન્‍ટ સાથે આધાર લિંક કરવું પડશે. તે જ સમયે, આધાર લિંક વિનાના વપરાશકર્તાઓ હવે એક મહિના દરમિયાન ૬ને બદલે ૧૨ ટ્રેન ટિકિટ બુક કરી શકશે.

વેરિફિકેશન પછી ટ્રેન ટિકિટ બુકિંગઃ ભારતીય રેલ્‍વેએ આઈઆરસીટીસી એપ અથવા વેબસાઈટ દ્વારા બુકિંગ માટે ફોન નંબર અને ઈમેલ આઈડી ચકાસવાનું ફરજિયાત બનાવ્‍યું છે. આ કામ કર્યા વિના હવે ટ્રેનની ટિકિટ બુક કરી શકાતી નથી. ચકાસવા માટે, તમે IRCTC વેબસાઇટની મુલાકાત લઈને બુક કરી શકો છો.