Gujarati News

બેંગલુરુ,તા.૧૬ : કર્ણાટકના બેંગલુરુમાંથી એક ચોંકાવનારો કિસ્સો સામે આવ્યો છે. અહીં ૨૨ વર્ષીય એક યુવતી સતત ૩ દિવસ સુધી ૬૦ ફૂટ ઊંડા કૂવામાં પડી રહી હોવાનું જાણવા મળ્યું છે. આ કારણે યુવતીના હાથમાં ફ્રેક્ચર થયું, તે સતત ૩ દિવસ સુધી મદદ માટે બૂમો પાડતી રહી. આ દરમિયાન તે કૂવામાં ભૂખી-તરસી પડી રહી હતી. આખરે આ યુવતીને હવે બચાવી લેવામાં આવી છે. આ યુવતીને તેના એક ઈન્સ્ટાગ્રામ દોસ્તે કૂવામાં ધક્કો મારીને પાડી દીધી હતી. પ્રાપ્ત માહિતી મુજબ આ ૨૨ વર્ષીય યુવતીના લગ્ન પ્રાઈવેટ કંપનીમાં કામ કરતા એક યુવક સાથે થયા હતા. પણ, એક મહિના પહેલા આ યુવતીની ઈન્સ્ટાગ્રામ મારફતે આદિત્ય નામના એક યુવકની સાથે મિત્રતા થઈ હતી. આદિત્ય નામના ઈન્સ્ટાગ્રામ યૂઝરે આ યુવતીને મળવાની ઈચ્છા વ્યક્ત કરી હતી. જ્યારે આ યુવતી તેના ઈન્સ્ટાગ્રામ દોસ્તને મળવા માટે પહોંચી ત્યારે આ યુવક તેને સ્કૂટર પર બેસાડીને એક ફાર્મહાઉસમાં લઈ ગયો.

       આ યુવતીએ જણાવ્યું કે જે યુવક સાથે મારી ઈન્સ્ટાગ્રામ પર મિત્રતા થઈ હતી તે મને સાંજે સાડા પાંચ વાગ્યે એક ફાર્મહાઉસ પર લઈ ગયો. અને કહ્યું કે આ મારું ફાર્મહાઉસ છે. ઈન્સ્ટાગ્રામ પર મિત્રતા કરનાર આદિત્ય નામના આ યુવકે તે યુવતી સાથે લગ્ન કરવા માટેની ઈચ્છા વ્યક્ત કરી. જ્યારે આ યુવતીએ લગ્ન માટે ના પાડી ત્યારે તે યુવકે તેની સાથે બળજબરી કરી. જ્યારે યુવતીએ તેનો વિરોધ કરતા યુવકે તેને મારી નાખવાની ધમકી આપી. આ યુવક તે યુવતીને ખેંચીને કૂવા પાસે લઈ ગયો અને તેને કૂવામાં ફેંકીને ત્યાંથી જતો રહ્યો. પોલીસે જણાવ્યું કે કૂવાની અંદર છોડ વગેરે હોવાના કારણે તે યુવતીનો જીવ બચી ગયો. પરંતુ, તેના હાથમાં ફ્રેક્ચર થઈ ગયું. તે મદદ માટે બૂમો પાડતી રહી પણ કોઈએ તેનો અવાજ સાંભળ્યો નહીં. તે સતત ૩ દિવસ સુધી કૂવાની અંદર પડી રહી. તે ત્યાં ભૂખી-તરસી પડી રહી.