Gujarati News

મુંબઇ, તા.૧૬: સુશાંત સિંહ રાજપૂતના અકાળે અવસાનના એક મહિના પછી પણ કેસની તપાસ મુંબઈ પોલીસ દ્વારા ચાલી રહી છે. આ કેસમાં પોલીસે અત્યાર સુધીમાં ૩૦થી વધુ લોકોની પૂછપરછ કરી છે અને તેમના નિવેદન નોંધ્યા છે. ત્યારે હવે એવા અહેવાલો આવી રહ્યા છે કે, મુંબઈ પોલીસ રિયા ચક્રવર્તીના ખર્ચાની તપાસ કરી રહી છે.

સૂત્રોના જણાવ્યા મુજબ, પોલીસ હાલ સુશાંતની કથિત ગર્લફ્રેન્ડ રિયા ચક્રવર્તીના ખર્ચા તપાસી રહી છે. રિયા સુશાંતના રૂપિયા ખર્ચ કરતી હોવાના અહેવાલ આવ્યા છે. રિયા સુશાંતના રૂપિયા ઉડાવતી હોવાના પુરાવા મળ્યા બાદ પોલીસે આ દિશામાં તપાસ હાથ ધરી છે. રિયાએ સુશાંતના કેટલા રૂપિયા વાપર્યા હતા તેનો આંકડો હજી સામે આવ્યો નથી.

એવો પણ દાવો કરવામાં આવ્યો છે કે પોલીસ આ કેસમાં ફિલ્મમેકર કરણ જોહરની પૂછપરછ નહીં કરે, કારણકે જે ૩૫ લોકોએ નિવેદન નોંધાવ્યા છે તેમાંથી એકેયે કરણ દ્વારા સુશાંતને હેરાનગતિ થતી હોવાની વાત કરી નથી. જો કે, પોલીસ હવે સુશાંતના ડોકટર અને તેની બહેન મિતુની પણ પૂછપરછ કરશે. રિપોર્ટ્સનું માનીએ તો, સુશાંતનો કૂક નીરજ કે જેને પોલીસે સૌથી પહેલા પૂછપરછ કરી હતી તેનું નિવેદન પણ ફરી નોંધવામાં આવશે. છેલ્લા અઠવાડિયામાં સુશાંત સાથે શું થયું કે તેણે આવું પગલું ભર્યું તે જાણવા માટે પોલીસ ફરીથી તેના કૂકની પૂછપરછ કરશે.

ઉલ્લેખનીય છે કે, ૧૪ જૂને સુશાંતે તેના બાંદ્રા સ્થિત દ્યરમાં ગળે ફાંસો ખાઈને જીવન ટૂંકાવ્યું હતું. તેના ઘરેથી પોલીસને કોઈ સ્યૂસાઈડ નોટ મળી નહોતી. સુશાંતના મોત બાદથી તેના ફેન્સ સતત બોલિવુડમાં નેપોટિઝમનો મુદ્દો સામે લાવી રહ્યા છે. સાથે જ આ કેસની તપાસ CBIને સોંપાય તેવી પણ માગ કરી રહ્યા છે.