Gujarati News

મુંબઈ તા. ૧૫ : સંસદના ચોમાસુ સત્રનો આજે બીજો દિવસ છે. કોરોના યુગમાં યોજાનારા સંસદના અધિવેશનમાં આજ પહેલા રાજયસભાની કાર્યવાહી કરવામાં આવશે . જો ઉપલા ગૃહની કાર્યવાહી સવારે ૯ થી બપોરે ૧ વાગ્યા સુધી ચાલશે તો લોકસભાની કાર્યવાહી બપોરે ૩ વાગ્યે શરૂ થશે, જે સાંજના ૭ વાગ્યા સુધી ચાલશે. સંસદમાં આજે ચીન સાથેના તણાવનો મુદ્દો ગૂંજશે. વિપક્ષ આ મુદ્દે સરકારને ઘેરી લેવા તૈયાર છે. આ સાથે જ સંરક્ષણ મંત્રી રાજનાથ સિંહ પણ આજે લોકસભામાં નિવેદન આપશે. રાજયસભાની કાર્યવાહી શરૂ થઈ ગઈ છે. ઉપલા ગૃહની કાર્યવાહી બપોરે ૧ વાગ્યા સુધી ચાલુ રહેશે.

સપાના સાંસદ જયા બચ્ચને કહ્યું કે, બોલિવૂડને બદનામ કરવાનું કાવતરૂ ચાલી રહ્યું છે. મનોરંજન ઉદ્યોગ દરરોજ ૫ લાખ લોકોને સીધો રોજગાર પૂરો પાડે છે. દેશની આર્થિક સ્થિતિ સારી નથી અને અમારો ઉપયોગ વસ્તુઓ તરફ ધ્યાન હટાવવા માટે કરવામાં આવી રહ્યો છે. અમને સોશિયલ મીડિયા પર નિશાન બનાવવામાં આવી રહ્યા છે. અમને સરકારનો પણ ટેકો નથી મળી રહ્યો. જેમણે ફકત ફિલ્મ ઇન્ડસ્ટ્રીની સહાયથી નામ કમાવ્યું છે તેઓ આને ગટર કહે છે. હું તેનું સમર્થન કરતી નથી. આ ઉદ્યોગમાં કેટલાક લોકો છે જે સૌથી વધુ કર ચૂકવે છે. પરંતુ તેમને પરેશાન પણ કરવામાં આવી રહ્યા છે. એસપી સાંસદે કહ્યું હતું કે, ફિલ્મ ઉદ્યોગને લઈને ઘણાં વચનો અપાયા હતા, પરંતુ તે કયારેય પૂરા થયા નહીં. સરકારે મનોરંજન ઉદ્યોગના સમર્થનમાં આવવું જોઈએ. આ ઉદ્યોગ હંમેશા સરકારને મદદ કરવા આગળ આવે છે. સરકાર ગમે તે સારું કામ કરે છે, અમે તેનું સમર્થન કરીએ છીએ. જયારે કોઈ આપત્તિ આવે છે ત્યારે બોલિવૂડના લોકો જ પૈસા આપે છે. જયા બચ્ચને કહ્યું કે, મને લાગે છે કે સરકારે મનોરંજન ઉદ્યોગને મદદ કરવી જોઈએ. કેટલાક ખરાબ લોકોના કારણે તમે આખા ઉદ્યોગની છબી બગાડી શકતા નથી. જયા બચ્ચને કહ્યું કે, ગઈકાલે લોકસભામાં એક સાંસદે બોલિવૂડ વિશે નિવેદન આપ્યું હતું. જે ખુદ બોલિવૂડ ઇન્ડસ્ટ્રીમાંથી છે. આ શરમજનક છે. આપણે જે પ્લેટમાં ખાઈએ છીએ તેમાં જ છિદ્ર કરીએ છીએ. આ ખોટું છે. ઉદ્યોગને સરકારની મદદની જરૂર છે.

ઉલ્લેખનીય છે કે, હાલમાં બોલીવુડ એકટર સુશાંત સિંહ રાજપૂતની આત્મહત્યા બાદ તેની પાછળનું કારણ જાણવા સીબીઆઈ તપાસ ચાલી રહી છે. આ તપાસ દરમિયાન ડ્રગ્સ એન્ગલ સામે આવતા એનસીડીએ તપાસ હાથ ધરી અત્યાર સુધીમાં ડ્રગ્સની લેવડ દેવડ કરતા ૧૬ જેટલા લોકોની ધરપકડ પણ કરી છે.