Gujarati News

Gujarati News

News of Thursday, 15th April 2021

લક્ષણો છતાં RT-PCR નેગિટિવ આવે તો સતર્ક રહેજોઃ છેતરી રહ્યો છે વાયરસ

ભારત જ નહીં દુનિયાના અન્ય દેશોમાં પણ કોરોના વાયરસ છેતરી રહ્યો છેઃ અમેરિકાના વૈજ્ઞાનિકે કરેલી આગાહી સાચી પડી : જો કોરોના રિપોર્ટ નેગેટિવ આવી જાય અને લક્ષણો હોય તેવું લાગતું હોય તો ઘરના લોકોનું વિચારીને કાળજી રાખવી જરૂરી

નવી દિલ્હી, તા.૧૫: જે રીતે કોરોનાના કેસ વધી રહ્યા છે તેને જોતા લોકોની ચિંતા પણ વધી રહી છે અને અવનવા સવાલો પણ ઉભા થઈ રહ્યા છે. પરંતુ બીજી તરફ એવું પણ સામે આવી રહ્યું છે કે કોરોના તમામ લક્ષણો હોવા છતાં ટેસ્ટમાં તે નેગેટિવ આવી રહ્યો છે. આવી સ્થિતિમાં વધારે કાળજી રાખવાની જરુર છે.

ઘણાં લોકો એ વાતને લઈને ચિંતિત છે કે આખરે કોરોના રિપોર્ટ નેગેટિવથી પોઝિટિવ કઈ રીતે આવી શકે છે? લોકોને આવા સમયે લેબ પર શંકા જાય છે, કયારેક સેમ્પલ લેનારી વ્યકિત પર તો કયારેક ટેસ્ટ સેન્ટર પર શંકા થાય છે. જોકે, સ્થિતિ કંઈક અલગ જ છે. કોરોનાની બીજી લહેર પહેલા કરતા વધારે દ્યાતક સાબિત થઈ રહી છે. પાછલા ૧૫ મહિનામાં કોરોનાએ પોતાનું સ્વરુપ બદલ્યું છે, આ કારણે ટેસ્ટમાં પણ તે પકડાતો નથી. અમારા સહયોગી ટાઈમ્સ ઓફ ઈન્ડિયાએ મંગળવારે રિપોર્ટ રજૂ કર્યો હતો કે, પ્રત્યેક પાંચમાંથી ૨૦% દર્દીઓનો રિપોર્ટ ખોટો આવી રહ્યો છે, જેમાં તેમને કોરોના હોવા છતાં તે પકડાઈ રહ્યો નથી. કેટલાક દર્દીઓને બીજા અને ત્રીજા ટેસ્ટમાં પણ સંક્રમણ અંગે ખ્યાલ નથી આવી શકતો.

આ ચિંતાની વાત છે, કારણ કે કોરોના વાયરસ હવે RT-PCR ટેસ્ટમાં પણ પકડાતો નથી. જોકે, RT-PCR કોરોના સંક્રમિતને ઓળખવા માટે એકદમ વિશ્વાસપાત્ર રીત મનાય છે. આવામાં રિપોર્ટ નેગેટિવ આવી ગયા બાદ દર્દીને ડોકટરને મળવાની જરુર નથી લાગતી અને વ્યકિત ઘરમાં કે ઓફિસમાં પોતાને બધાતી અલગ પણ નથી રાખતી. આવી સ્થિતિમાં દર્દીનું સ્વાસ્થ્ય વધારે ખરાબ થાય છે અને અન્ય સંપર્કમાં આવેલા લોકો પણ સંક્રમિત થાય છે.ઈન્સ્ટિટ્યુટ ઓફ લીવર એન્ડ બાઈલિયરી સાયન્સના પ્રોફેસર, ડોકટર પ્રતિભા કાલે જણાવે છે કે, દર્દીઓનો રિપોર્ટ ખોટો આવી રહ્યો છે આવામાં શકય છે કે તેમના નાક અને ગળામાં વાયરસ છે જ નહીં. આ કારણે નાક અને ગળામાંથી લેવાયેલા સ્વેબ સેમ્પલનો ટેસ્ટ કરાય ત્યારે તેમનો રિપોર્ટ નેગેટિવ આવે છે.

અમેરિકાના ઈલિયોનિસ યુનિવર્સિટી અને મિશિગન સ્ટેટ યુનિવર્સિટીના વૈજ્ઞાનિકોએ પાછલા સપ્ટેમ્બર મહિનામાં એક રિસર્ચ પેપર પબ્લિશ કર્યું હતું, જેમાં કોરોનાના બદલાતા સ્વરુપના કારણે તે ટેસ્ટમાં પકડાશે નહીં તેવી ચિંતા વ્યકત કરી હતી. તેમણે એ સમયે ચેતવણી આપી હતી કે વાયરસ મ્યુટેશનથી ખોટો રિપોર્ટ આવી શકે છે, ત્યારે યુકે, દક્ષિણ આફ્રીકા અને બ્રાઝિલવાળા વેરિયન્ટ્સ નહોતા આવ્યા, પરંતુ તે વેરિયન્ટ હાલ વધારે આક્રામક બની રહ્યા છે. માત્ર ભારતમાં જ નહીં અન્ય દેશોમાં પણ કોરોના ટેસ્ટિંગ કિટ ખોટા પરિણામ આપી રહી છે.

RT-PCR ટેસ્ટમાં કોરોના વાયરસના દ્યણાં ભાગોની તપાસ થાય છે, પરંતુ અલગ-અલગ દર્દીઓથી લેવામાં આવેલા સેમ્પલમાં અલગ-અલગ જિનેટિકના SARS-CoV-2ના કારણે રિપોર્ટમાં અંતર હોઈ શકે છે. જોકે, અમેરિકાની સ્વાસ્થ સંસ્થા FDAના ડોકટર સલાહ આપે છે કે તેઓ કોરોના રિપોર્ટ નેગેટિવ આવે તે પછી પણ શંકાસ્પદ જણાતા દર્દીનો વારંવાર ટેસ્ટ કરતા રહે.

(3:51 pm IST)